Afrawan

07 juillet 2021

Imeḥbas Iqvayliyen ur yelli fell-asen smeḥ !

 

20-avril-2019-succes-des-marches-du-mak-en-kabylie-pour-lindependance-de-la-kabylie-795x385

 

Deg yiwen n rrabul i d-yezzuzer uneɣlaf n tenzerfa ass n Lḥed 4 yulyu, yewwi-d ɣef uselway n Lezzayer Abd Elmadjid Tebboune, d akken yessuter aserreḥ n 18 n wid yettwaṭfen ɣer leḥbas. Maca imeɣnasen iqbayliyen, ur d-ddin ara deg umuɣ n wid ara d-yeffɣen seg lḥebs.

Aneɣlaf n tenzerfa yinaw d akken ilmend n umulli wis 59 n timinnent n Lezzayer, Aselway Abd Eladhid Tebboune, iɛeggen-d ad ig tisuraf i usemmeḥ. Seg wid umi ara d-serḥen, d wid kan i yettwaṭfen deg tikliwin d tmesbaniyin, ama deg Cirṭa, Beskra, Mestɣanem, d tmanaɣt, ma d Iqbayliyen ur d-ddin ara imi tanbbest i sen-gan d tin n yuɛren aṭas, d tin yerzan rrebrab, asami n tezdit taɣenawt.

Akken kan ad d-nesmekti, tinebbas-a i sen-gan i yiqbayliyen, ur ddin-t ara d tilawt neɣ d tbadut i yettunefken i rrebrab sɣur tisuddiwin tigraɣlanin akka am ONU. Imeḥbas Iqbayliyen i yettwaṭfen ɣer wass-a deg leḥbas deg myal tamnaṭ deg tmurt n lezzayer, deg tidet, d wid yettwaṭfen ilmen-d n tiktiwin-nsen d tirmad-nsen deg wannar usmeɣnes.

 

Posté par Yacine KHELIFA à 02:03 - - Commentaires [0] - Permalien [#]
Tags : , ,


13 décembre 2020

Tabrat n tririt neɣ n unadi ɣef lxedma

joie-au-travail-image-phare

 

 

 

Isem d Nekkwa

Tansa :

Angal n tserqest / tamdint :
Uṭṭun n Tiliɣri :

E-Mail :

 

Temmug deg …………..(Tamdint), ass n ……………

 

Taɣawsa : Asuter n lxedma / Attekki ɣer temrecceḥt n lxedma (ticki d takebbanit i yettnadin axeddam)

 

Mas, Massa ;

 

Deg tallit-a deg i ttnadiɣ ɣef uxeddim, ad iyi-tsurfem ad awen-d-azneɣ tabrat-a deg ara wen-d-ssutreɣ adeg lxedma.

 

Xerṣum, walaɣ d akken, tirmit i liɣ, d tin iwatan i wadeg n lxedma i wumi i d-tebram deg tkebbanit-nwen, (win i d-tezzuzrem deg....).

 

Asileɣ-inu deg (......................), yessuref-iyi ad iliɣ tamusni, yernu ad snerniɣ tizemmar gar tid ɣef i tettnadim. Liɣ akk tiḥerci swayes ara tt-selkeɣ deg tirmad ara yettunefken. Lebɣi d leḥmala, d teɛzima i liɣ, d nutni i d-tulmisin tigejdanin zeggireɣ ɣer sdat deg uxeddim.

 

Tarmidt i d-sɛeddaɣ deg (......adeg deg i tqedceḍ yakan), tessuref-iyi ad snerniɣ timusniwin ilaqen akken ad siwḍeɣ ad qedceɣ deg wadeg ara y-id-yettunefken. Deg waṭas n tikwal deg i giɣ tirmad icuban tigi, ssawḍeɣ ad mhazeɣ deg leqdic akken ad geɣ myal asurif war afus ɣer yidisan-iw.

 

Akken dɣen i lliɣ d win/tin i izemren ad ɛacreɣ agraw, yerna ttekkiɣ deg terbaɛt n uxeddim war ma liɣ aɣbel deg tikli-w. Ugar n waya, ttwaliɣ d akken d ayen ara yesnernin deg tmusni-w d usemhez n tzemmar-inu.

 

I wugar n yissalen, ad qqimeɣ deg wassaɣ yid-wen i kra ma tlam d asteqsi, akken daɣen i wejdeɣ ad ken-mlileɣ deg wass i iwatan taswast-nwen.

 

 

Deg uraǧǧu n tririt-nwen, ssarameɣ ad tqebleḍ, Mas, Massa, iḥulfan n leqder d ccan s ara ken-ǧǧeɣ.

 

Astenyi

X.Y

 

Posté par Yacine KHELIFA à 16:59 - - Commentaires [0] - Permalien [#]
Tags : , , , , ,

12 décembre 2020

Hicham Boudaoui, yettwargem ɣef yiẓeṭṭaten inmettiyen.

Hicham

Hicham Boudaoui, yettwargem ɣef yiẓeṭṭaten inmettiyen.

Iẓeṭṭaten inmettiyen n waṭas n yizzayriyen tekker deg-sen tmes seld mi yettekka umarir n ddabex uḍar, Hicham Boudaoui, deg temlilit i yellan gar terbaɛt-is OGC Nice n Fransa d Beer-Shev’a n Israël.

Deg wass n Lexmis yezrin, yessakel umarir ɣer Israël, anda ara d-tili temlilit ; Aṭas n yizzayriyen i yerkeb lɣiḍ, rran tamsalt-a d tin n nnif, ttwalin d yar iseɣ imi iṛuḥ Hicham Bouadoui ad yurar mgal tamurt swayes ur testeɛref ara Lezzayer. Tamsalt ur teqqim ara kan gar yiɣarimen, maca tezger akkin, anda i d-gren iman-nsen ula d iɛeggalen n tsertit, ttekkin deg uzernen ; Ɣas ulama llan kra n yemdanen i yemḥaddin fell-as maca aṭas n wid i t-iregmen s yar d yal awal, semman-as, aḥerki, sioniste, llan wid yessutren ula ad yettwagdel fell-as ad d-yekcem ɣer Lezzayer...

Abderrazak Mokri, aselway n MSP, akabar isneslem, yessenfali-d ɣef umarir, d akken, yettekka deg lexdeɛ d tiḥerkelt, yerna yegla s wid i yettemhaddin fell-as, d akken, d Iṣehyunen.

X.Y

Posté par Yacine KHELIFA à 20:56 - - Commentaires [0] - Permalien [#]
Tags : ,

Iran twekked-d leḥkem n leɛdem i yettwagen ɣef unemgal Rouhollah Zam

Rouhollah Zam

 

 

 

 

 

 

 

 

 

 

 

Iran twekked-d leḥkem n leɛdem i yettwagen ɣef unemgal Rouhollah Zam

Deg yiwet n tallit, yella yenfa iman-is ɣer Fransa, anemgal Rouhollah Zam, yettwaɛdem ass-a n Sebt sbeḥ, seld mi d-yettwawekked leḥkem n leɛdam fell-as ɣef dra n twuri i ila deg umussu n ucetki i d-yeḍran deg tegrest 2017-2018, akken i d-segzan deg yisallen n tiliẓri n taɣenawt n Iran.

Yettwaṭṭef sɣur srabes n « iɛessasen n tegrawla », d igen asnaktan n tigduda tisneslemt deg Tuber 2019, maca Iran ur d-tefki wara adeg ideg yettwaṭṭef neɣ ass s tseddi. Ɣef zyada, yerna yettwardu d akken iqeddec sdaw n leɛnaya n srabes n usumel n Fransa, yerna tettwafka-as-d tallelt sɣur wid n Israël d Tmura n Leǧnas Yeddukklen.

X.Y

 

 

 

Posté par Yacine KHELIFA à 15:43 - - Commentaires [0] - Permalien [#]
Tags : , , , , , , ,

08 décembre 2020

D ttar neɣ d lqella n lɛezza i yettidir unelmad Azzayri deg Fransa !

illustration-ZEP-e1571388109288

D ttar neɣ d lqella n lɛezza i yettidir unelmad Azzayri deg Fransa !

 

🔵 Anelmad Azzayri i yettidiren deg layas deg tmurt-is, ur yeǧǧi taluft ur yexdim akken ad d-yinig anda ara isemmed almud ines, ad yemhaz di tusna, yerna ad yeḍmen imal ines ; dɣa, tamurt i sen-iqerben, ideg llan ttawil, ad gen tasekkirt akken ad jerden iman-nsen deg tesdawit taberranit, yerna ad d-ḥellin l’Visa, ad inigen, war ccek, d tamurt n Fransa. D acu kan a win yeẓran amek i tt-ttidiren ticki wḍen ɣer dina, ladɣa deg tallit tamirant deg i yettidir umaḍal tazɣen i d-yessexlef uvirus Covid-19 ?

 

🔵 Anelmad Azzayri deg tmurt n Fransa, send ad d-ihaj fell-aɣ uvirus Covid-19 , tella yakan d tudert n lmiziriya d umennuɣ n yal ass, ger unadi n tmezduɣt d unadi n lxedma, ɣer ukemmel n ulmud d usewjed n wayen i s-ilaqen deg tudert-is. Almud deg tmurt n Fransa i win ur ilin ara tawacult, yessefk fell-as ad d-yaf axeddim, axxi tarmudt tamecṭuḥt kan akka, yes-s ad d-yessekcem ɣer texriṭ, yes-s ad ixelleṣ tamezduɣt-is, ad iqewet iman-is, ma yessaweḍ yessegra-d cwiṭ, ahat ad d-yaɣ iselsa imaynuten !

🔵 Anelmad Azzayri, mi yewweḍ i tikkelt tamezwarut ɣer Fransa, ad yeḥṣu d akken ur ili wara yiwen uzayar d yinelmaden i d-yusan seg tmura-nniḍen ; Anelmad Azzayri, yettwarez ɣer wassaɣen, n umtawa gar tmura, gar Lezzayer d Fransa. Deg umtawa-a i yettuɣalen ɣer 27 Dujenber 1968, yella wayen ila uzzayri d nnfeɛ ugar weyaḍ, maca, deg tallit n ulmud,  yettwarez s umtawa-a ugar n wayen yessenfeɛ, yes-s. Anelmad Azzayri, yessefk fell-as, ad d-yessuter ttesriḥ ɣer DIRRECT, akken ad yebdu leqdic, ayen ur yellin ara ɣer yinelmaden n tmura-nniḍen, dɣa, d tasekkirt tadeblant n zzayed ara d-yernu d aɛewwiq... Ayen i d aɛewwiq ? Imi, deg tazwara, imi ara ad tesɛeddiḍ amsezwer ɣer uxeddim, ur k-yettextir ara umɛellem, neɣ tkebbanit, imi ur ḥemlent ara ad kecment deg tazla ɣef lekwaɣeḍ, d tsekkirin tideblanin, daɣen, mačči akk imɛelmen neɣ tikebbaniyin, snen amtawa-a i yellan gar tmura, dɣa yetteffeɣ-iten laman deg unelmad-nni ticki yebder-asen-d tisekkirin-a ; Deg uswir wis sin, akud, d tadrim, ihi, imɛelmen d tkebbaniyin ur ttrajun ara tisekkirin-a i yettaṭṭafen akud ameqqran, yernu ur sen-yeḍmin yiwen ma ad d-awin ttesriḥ neɣ ala, ayen i ten-yettaǧǧan ad fernen anelmad aberrani wala Azzayri.

🔵 Send axeddim, llant tsekkirin nniḍen tideblanin i yurzen anelmad ticki yewweḍ ɣer Fransa, imi Anelmad azzayri, drus maḍi i yessawaḍen, ttawin-d azref ɣer texriṭ n ulmud, dɣa, mi yewweḍ unelmad, yewwi-d fell-as ad d-inadi tamezduɣt ; akken ad d-yaf tamezduɣt, ilaq-as ṭṭamen, ara iḍemnen akerray lexlaṣ n tmezduɣ, dɣa win ur yessinen ula yiwen, yerna ulac tawacult ara t-yallelen, yella ttawil n ṭṭmana ɣer lbanka, maca akken ad yeldi amiḍan deg lbanka, yessefk ad ili tansa anda yezdeɣ ! Send ad yessaweḍ ɣer uxeddim, yessefk ad d-yaf tamezduɣt, yessefk ad yeldi amiḍan deg lbanka, yerna yessefk ad ijerred iman-is ɣer Préfecture de Police anda yezdeɣ akken ad as-gen Carte de Séjour, war takerḍiwt-a ur yezmir ad ig kra, ula d aɛirej ɣer kra ma yellan d asurif ɣer sdat, ala ajerred ɣer tesdawit ɣur yettwaqbel. Akken ad as-d-teffeɣ Carte de Séjour, ma ulac akk tasekkirt tettaṭṭaf azal n 3 ɣer 4 Wayuren. Akken daɣen i llan iɛewwiqen-nniḍen war leḥsab, akka am ujerred ɣer usenkid, aneggaru-a ma ur t-ili wara ulayɣer ad inadi ɣef uxeddim, maca wigi d adday i d-yewwi ad ten-id-yessewjed unelmad ara yawḍen i tikkelt tamezwarut ɣer Fransa.

🔵 Ɣef tnagit n waṭas n yinelmaden, ur ssawaḍen ara ad frun tisekkirin-a tideblanin alma icab yixef-nsen, llan wid ferun aḥric, yettɣim-asen-d uḥric, yekbel-asen afriwen. Aṭas daɣen n yinelmaden, i d-yennan, d akken seg uraǧǧu ad frunt akk tazliwin-a, gellun s texṛiṭ i wwin yid-sen yeg tmurt. Gar tazla d utqelleq, skud ulac axeddim, d awezɣi ad ikemmel unelmad almud-ines ; ad iṛuḥ ad d-yennadi s wacu ara yidir, neɣ ad yesseḥmu asɣim deg tesdawit, imi deg inig, win ur nekmiz i yiman-is, anwa ara s-ikemzen ? Llan yinelmaden umi, kfan yedrimen, ur ufin s wacu ara qewten, ur lin s wacu ara xelṣen tamezduɣt-nsen, ayen i ten-yettarran d taɛkemt ɣef wid i yekran yid-sen, deg waṭas n tikwal, ssufuɣen-ten-id seg uxxam, ma yella ur xelṣen ara.

🔵 Lewhi i d-yellan akka ɣef yinelmaden, d tudert n yal ass, send tazɣent tadawsant i iḥuzan amaḍal i merra ; Ass-a, deg tallit anda akman, d imḥettem ɣef yemdanen, deg tallit anda aṭas n taɣulin n lxedma ideg yettwagdel uxeddim alma iɛedda ukman, deg tallit anda tadbelt, tessenqes deg yiqeddacen ilmend n umbaɛad anmetti, d ttawilat i yettwagen i useḥbiber ɣef ugdal n ubrid i uvirus ad yenfufed ugar, Taswiḥt temcekkal ugar ɣef unelmad s umata deg tmurt n Fransa. Yakan, yettwassen seg zik d akken aneggaru akk deg uswir anmetti deg Fransa, agellil, d anelmad ! Amek i tḍerru d unelmad Azzayri deg Fransa, ladɣa mi d-yerna lhem-is uvirus, i yessenbawlen ula d tadamsa ?

🔵 Sennig n wayen yellan yakan, tazɣent tzad ugar, tzad imi ula d tisekkirin tideblanin ttaṭṭafent ugar n wakud, ayen yeǧân ad jemdent aṭas n termudin, d leqdicat. Skud tadbelt tettaṭṭaf ugar n wakud, skud anelmad ikeččem deg leɛḍil ugar, skud, tettwagdel, tufɣa, yettwagdel uxeddim deg waṭas n taɣulin, ayen ara yeǧǧen tifin n uxeddim ad yuɣal d awezɣi. Seg tama n usenkid, ur yeḍmin ara ma yeɣli-d yuḍen neɣ yella kra n usehwi i s-d-yeḍran ; asenkid ulac, skud tisekkirin tideblanin ɛuqqrent ! Seg Tama n ulmud, gar tsedawiyin i imedlen tiwwura d ttawil n ulmud seg lebɛid, s ttawil n internet, amek ara ig unelmad ur ilin ara ttawilat-a ma ulac akk, yessefk ad ili aselkim, d internet, ayen ur yellin ara d ayen isehlen ad t-yekseb ula d uxeddam i yettaɣen SMIC, abeɛda ɣef unelmad ur yettlaḥaqen ara ad yaɣ taxbizt s ara yerẓ llaẓ. Deg Tallit send Corona, anelmad Azzayri, yeggar afus, d tiɣri ɣer yemdanen d tmusniwin i iqerben neɣ ibeɛden, yeggar tiɣri ɣer tdukliwin d tudsiwin i iqedcen, i yettaken afud i talsa ; maca deg tallit yecban ass-a, imdanen akk tḥza-ten tezɣen, ula d tidukliwin d tudsiwin-a ttwasutrent afus n tallalet seg myal tama !

🔵 Deg wahil n tallelt i iga udabu n Fransa i yiɣarimen d tkebbaniyin, yella-d wawal ɣef tallelt ara yilin i yinelmaden s umata, maca tamsalt teqqen ɣer wakud, imi akken ad d-sfaydin seg ttawil-a d umahila, yessefk ad jerden iman-nsen ɣer La CAF.Fr, Maca, aɣbel, deg leɛḍil i tettaṭṭaf tneggarut-a i tririt ɣef yisutar n yal yiwen, yerna tetḥettim ad yekseb win ara yessutren tallelt, Carte de Séjour, akken ad ikemmel ajerred, ladɣa anelmad Azzayri i yewḍen aseggas-a amezwaru, urɛad ila Carte de Séjour, neɣ temmut-asen yessefk ad tt-yesnunet, ayen ara yeṭṭfen akud d ameqqran ; deg leɛḍil tazɣent tettzad !

 

🔴Seg 2019, ɣer wass-a, anelmad Azzayri, yečča tamrar deg yinig, anda yettwarez gar tsekkirin tideblanin ur yessawaḍen ara alma icab, akked tgellelt, zzelṭ, aṭan, tazɣent seg myal tama ; ma ur d-yelli wara ufus n udabu deg lebɣi n usillel, seg myal tama, ama seg tama n Fransa, ama seg tama n Lezzayer, Anelmad Azzayri, yettidir times deglqaɛa ! D tallit anda, tisudutin n uwanek, ad gen ttawil, akken ad tbeddel tegnit n tezɣent ɣef unelmad ur ilin ttawil akken ad ibeddel taswiɛt s yiman-is, war tallelt deg ussan-a i d-iteddun, adabu d aɛemmed i iɛemmed, imi ulac anwa ur yeẓrin ara addad adday ɣur yessaweḍ unelmad ass-a deg yinig.

X.Y

Posté par Yacine KHELIFA à 21:29 - - Commentaires [0] - Permalien [#]
Tags : , , , , , ,


Tamuɣli ɣef tudert d umecwar n Leḥsen Beḥbuḥ

📰📜Tamuɣli ɣef tudert akked umecwan n Leḥsen_Behbuh

 

 

 

 

 

▪️ Ticki ɣriɣ tadiwennit i as-iga Mass Mḥemmed Ḥasan i Lḥasen Behbuh, riɣ ad d-aruɣ amagrad deg ara d-jemleɣ tiktiwin tigejdanin ɣef umeɣnas-a i yuran, i iqedcen ɣef tutlayt akked yedles amaziɣ, imi d ayen i d-yenna s yimi-s deg wayen yecfa akk deg umecwar-is deg leqdic ɣef Tmaziɣt.
Talalit-is :
▪️Lḥasen beḥbuh ilul ass n 16 deg juber 1946, deg tallin n ṭṭrad, deg tallit ideg yebda yettbin-d yisem n tmaziɣt i d-yeglan s tezɣent deg uswin n ukabar aɣelnwa PPA-MTLD. Lḥasen Behbuh, yeǧǧa-t baba-s i yewḍen leɛfu Rebbi, netta deg 11 n yiseggasen deg tudert-is, s yin akkin d ɛemmi-s i t-irefden netta akked gma-s. Iguga-ten ɣer tmanaɣt, (Birxadem), deg useggas n 1957, dina i yelmed tafransist ɣef yiserdasen ifransisen, azal n useggas, s yin yekcem ɣer uɣerbaz amezwaru seg 1958 ɣer 1961, s yin iɛedda srid ɣer uswir n tesnawit war ma yekka-d ɣef uswir wis Sin, seg 1962 ɣer 1965, akken kan i as-d-tewweḍ leɛraḍa n uɣerbaz uselmed n tesnakfust, yeǧǧa tasnawit akken ad yesɛeddi deg tneggarut-a azal n Mraw iseggasen, d aqeddac deg-s, d imḍebber deg wannar n taywalt.
🟢 isurifen-is imenza deg usfuggel n lwelha ɣer tmaziɣt :
Deg yennayer 1971, imi i as-yesken yiwen n umdakkel-is, Berrawi Muhub yiwet n telseqt ideg d-yella wahil n tirmad i d-tettheggi tkadimit n tmazɣa n umbeddel akked unadi deg yidles amaziɣ deg Lpari, Behbuh, yera tabrat i unemhal n tneggarut-a, anda i yessebgen lebɣi-s n unadi ɣef tusna n wahi i d-tessewjad tdukkla-a deg wannar n Tmaziɣt ; s yin tuɣal-as-d tririt s-ɣur Mass Besɛu Muḥen Aɛrab, i as-yesbeynin seg tama-s lebɣi n ujmal-ines ɣer tidukkla-a (ad yili d amslaḍ deg-s, dɣa seg wassen i yebda leqdicat ɣef Tmaziɣt sdaw n tarrayt n Muḥend Aɛrab. Yettaru Tamziɣt s dima s yisekkilen igraɣlanen, akken daɣen i yettaru s tfinaɣ i yettwali d tusridt ɣer tidet n tutlayt Tamaziɣt.
🟢 Amek i d-yesɛedda tagnit n lḥers mgal tutlayt Tamaziɣt deg tallit n Bumedyen :
Deg tallit-a, ameslay s Tmaziɣt neɣ ɣef Tmaziɣt yuḥwaǧ aṭas n tebɣest, nezmer ad d-nini d aɣewweɣ ; ɣaf wakken i as-d-yenna deg udiwenni i as-iga Mḥemmed Ḥasani, « Ssawḍeɣ ttwawteɣ ula s iserfiqen s-ɣur iǧadermiyne akked lapulis n tmanaɣt, axater meslayeɣ-d s teqbaylit sdat-nsen », dɣa seg wassen i d-tlul deg tidmi-s tririt n ttar akked usiǧǧhed n leqdic akken ad issinen akk yemdanen azal n tutlayt-nsen tayemmat. Deg tallit-nni, iferreq tiwerqtin, taywalin, ilɣa i d-tessewjad tkadimit n tmazɣa n Lpari, s yin yessaweḍ almi d-yesbed yiwet n tsuddut i wumi isemma « Afus deg ufus » netta akked yimdukal-is. Akken i yella deg wassaɣen akked yegrawen yemgaraden, anda i tembeddalen tamusni ɣef Tmaziɣt, akka am « ugraw imaziɣen » akked tezrigin i d-yettefɣen deg yal taggnit. Deg lebɣi n Mass Behbuh, d aɛeddi seg wawal ɣer tigawt ; iga aṭas n tezrawin akked leqdicat ɣef tesnilest tamaziɣt, anda i yeslugen tamziɣt s tarrayt-is i yeṭṭurfan ɣef tiyaḍ, yewweḍ almi yesteɛref yes-s Besɛu Muḥend Aɛrab, s yin yekfa tazrawt-is deg useggas 1979 seld kraḍ n yiseggasen n lḥebs.
🟢Tallit n Lḥebs :
Yesɛedda azal n 08 n yiseggasen deg lḥebs n Lumbaz, dinna i ila akud akken ad yeqdec ugar ɣef tesnilest tamaziɣt, ladɣa imi yemlal akked waṭas n yimaziɣen n myal tiɣmert n tefriqt ugafa. Deg leqdicat-is, yura ɣef umezruy, yerna yesserwes gar ittewlen n temsislin n yisekkilen n tfinaɣ akked wid n taɛrabt, dina i yerfed leqrar n usemres n yisekkilen igraɣlanen seg « A ɣer Z » akked « 0 ɣer 9 » ; leqdicat-is ttwaksen deg ufus-is seld mi d-yeffeɣ seg lḥebs deg 1983. Ɣef wakken i as-d-yenna, dima i uneɣmas i d-nebder yakan, « Ar ass-a ur ay-d-rrin ara leqdicat-iw, lukan ad afeɣ win ara ay-ten-id-yerren, ad iy-allen s waṭas… azal n 05 kilu n lkaɣeḍ, ass-a d awezɣi ad d-alseɣ ayen akk zerweɣ s ccfawat ». Deg tallit-is n lḥebs yemlal akked leǧǧnas yemgaraden i as-d-yettawin idlisen ɣef tutlayin-nsen, anda i yesserwes gar unagraw n tutlayin-a akked tjerrumt tamaziɣt. S yin yuɣal ɣer tira, yura adlis i wumi isemma « Tirrigroemt », win i yuzen i tezrigt n Salem Caker deg INALCO deg 1984, maca aneggaru-a ur tyeqbil ara, imi i as-t-id-yerra, yenna-as-d ur yeddi wara deg ubrid n Dda Lmulud, akka i as-t-id-yulles dima i uneɣmas-a aneggaru. Behbuh yeǧǧa-aɣ deg wussan-a yezrin, sutreɣ ad as-yeɛfu Rebbi, ig-it gara t rraḥa akked rreḥma netta akked yineɣmasen-nniḍen i yefkan afud akked tudert-nsen i tmaziɣt.
🔹Yeffeɣ-d deg uɣmis Tiɣremt deg Fuṛaṛ 2015. Sɣur : X.Y

Posté par Yacine KHELIFA à 13:01 - - Commentaires [0] - Permalien [#]
Tags : , , , ,

Ur yesqerdic ḥed ɣef yiwet n deffa

Aucune description de photo disponible.✅ Ur yesqerdic ḥed ɣef yiwet n deffa.✅
Llant snat n tlawin ttnaɣen gar-asent ; iḍul yiniɣ-nsent. Tekker yiwet truḥ ɣer ccix tenna-as : « Anɛam, a ccix, fru-aɣ taluft-agi ».
Yekker ccix-nni yefka-as-d cwiṭ n taḍuṭ, yerna-as-d yiwet n deffa uqerdac, yenna-as : « ax cwiṭ-agi n taḍuṭ, qqerdec-d ameččim agi deg leɛḍil ».
Tenna-as : « a sidi, ɛni zemreɣ ad qerredceɣ ɣef yiwet n deffa ? ».
Yenna-as : « ula d nekk ihi, d awezɣi ad ḥekmeɣ alma teḥḍer texṣimt-im ».
🔴 X.Y, Seg tmucuha n teqbaylit.

Posté par Yacine KHELIFA à 12:56 - - Commentaires [0] - Permalien [#]
Tags :

24 août 2020

Tamacahut n Ɛemmi Belhimi

 

Tamacahut n Ɛemmi Belhimi

Listen to this episode from Yacine-kh on Spotify. Tamacahut n Ɛemmi Belhimi, d yiwet n tmacahut i d- ttalasen yeqvayliyen i warraw-nsen. Tamacahut n teḍsa, yerna terfed izen ara yegzu uqrur deg tudert n yal as.

https://open.spotify.com


Posté par Yacine KHELIFA à 00:16 - - Commentaires [0] - Permalien [#]

07 août 2020

Tiɣremt, aɣmis yerḥan adabu

Asefrarax !

Seg 2014, i d-yefrurex uɣmis « Tiɣremt » seg uɣmis « La Cité » yettwarun s tefransist, d asefrarax i d-yettbinen kraḍet n tikkwal deg ddurt s wazal n ukuẓet n tferrawin yettwarun s tmaziɣt, azal n 2 n yiseggasen d netta yettferfir seg/deg mayal tamnaṭ deg tmurt taqvaylit s ukuzet iferrawen iwecmen s yisekkilen, deg yerfed isallen akken ad ten-yezzuzer ɣef yimeɣriyen i t-yettraǧǧun myal tikkelt s ccuq. Asefrarax Tiɣremt d win yunzan afriwen i d-yemɣin i tutlayt Tamaziɣt ; amaziɣ, aqvayli ladɣa, iwala tutlayt-is d takmamt teffeɣ seg tmadwant, tekkcem deg usemres amaynut, nnig n udlis yettwarun d tazrawt ɣef tmaziɣt, maca tikkelt-a d tamaziɣt i d ttawil i d-yettarun ɣef tmirant ɣef yisali, ɣef tusna. S uɣmis Tiɣremt tamaziɣt tekcem ɣer wannar amaynut anda tutlayt terfed taɣamsa, taɣamsa i yettarun ɣef myal taɣult ɣef myal tifurkect ɣef myal asentel i yeddan d wakud amiran neɣ deg tikwal azgerkud ; s waya tamaziɣt terfed acqirew amaynut s leɛtab n yimeɣnasen i yeẓẓan iswi akken ad illin deg ttiɛad d yimeɣriyen i sen-yefkan tabɣest s iwenniten i d-ttaran s wudem usenmer i yiɛeggalen n uɣmis ; Tiɣremt d La Cité.

 

 

 

 Yuɣal d imesriffeg !

 

 Imesriffeg, d afrux amecṭṭuḥ i yettelmaden ad yeseqdec iferrawen-is akken ad yefferfer iman-is deg yigenwan. Aɣmis « Tiɣremt », ira ad yefferfer iman-is s useqdec n wafriwen-is, war ma yesseqdec wid n uɣmis « La Cité » i as-d-yefkan lɛec deg tazwara akken ad d-yefrurex ; aɣmis Tiɣremt ɣer tagara n useggas 2015 tlul-d tikti gar yiɛeggalen-is d akken ad gen aɣmis Tiɣremt d ummid myal ayyur, ara d-iteddun d uɣmis “La Cité”. Maca ticki yettwabda ccɣel deg 2016, tisizregin ggumant ad yemmug i tunzut imi sdaw n uɣmis La Cité i yella, ihi yewwi-d ad yettunefk baṭṭel (d tikci).

 

  

 

Aṣeggad, yegguni-d s ubeckiḍ, afrux ma yelmed ad yefferfer, ad iɛelli deg yigenwan, ulac win ara t-id-yeṭṭfen, aseggad yewwi-d ad yewwet ɣer yiferrawen ! Ma yefferfer uɣmis Tiɣremt, yegla s yisekkilen yeččuren d izen, yeččuren d isallen, ad ten-yezzuzer, ad aɣen deg myal tiɣmert, yezmer ad yaweḍ ula ɣer yemnigen deg tmura-nniḍen n umaḍal. Afrux yettwazen ad yawi izen. Seg 2016, adabu iger-d, uguren ɣer ubrid, yegguma ad d-yefk ttesriḥ i uɣmis Tiɣremt akken ad d-yeffeɣ d aɣmis i yiman-is, ɣas ulama rrwan tazla yiɛeggalen-is d yemḍebren fell-as ɣer tneɣlaft n taywalt, maca wara nfeɛ ; ur d-yettak warẓeẓ tamment !  

 

 

 

 Afrux yuffeg !

 

 Yuffeg, yessen ad yelali, yessen ad yaffeg deg leɛlali  ; afriwen imɣuren, ččuren, ḍelqen, ttaṭṭafen-d abeḥri. Afrux yuffeg : Deg useggas 2019, deg Furar, deg umuli n tlalit n uɣmis Tiɣremt i tekkelt tamezwarut deg 2014, yettunefk-as ttesriḥ akken ad yerfed deg wafriwen-is, izen, isekkilen, awalen, tifyar, d yeḍrisen, iḍrisen yeččuren d isallen. Aɣmis Tiɣremt ad yettaffeg yallas, aɣmis Tiɣrem yuɣal d aɣmis ayalas ; irezzu yallas ɣer yimeɣriyen. Aseggad am yal tikkelt yegguni, abeckiḍ ibeddel-as tayet, afus ɣef znad, tiṭṭ ɣef temrit, iweha ɣer ufrux, deg wass wis 5 i yetteka fell-as, akken ad t-id-yesseɣli ; aɣmis tḥuzat tyita !

 

Aɣmis Tiɣremt i yuɣallen d ayalas deg Furar 2019, seld tufɣa-as, 5 n wussan, yettemseḍfaren, yewweḍ-d yisalli n ugdal usizreg-ines i yiɛeggalen n uɣmis. Adabu, uffir, adabu n tilifun, iḥettem-d tira n uɣmis s yisekkilen n taɛrabt, ma ulac aɣmis Tiɣremt ur yettɛawad ara ad d-yeffeɣ !

 

Seg yisallen i d-yeweḍen ɣer yiɛeggalen n uɣmis, d asuter n usekki, axxi, kra kan n yisebtar deg uɣmis s yisekkilen n taɛrabt, maca ineɣmasen, ttarun-d s yisekkilen ilatiniyen, agraw n tira deg uɣmis, yettaru, yesseɣtay s yisekkilen ilatiniyen, imawlan n uɣmis, imawlan n tutlayt, ran ad arun tutlayt-nsen s yisekkilen ibɣan, imi ɣef wakken i yenna Mass, Yacine Zidane, yiwen gar wid yellan deffir n tlalit n uɣmis, yerna, d imseɣti yettekkin deg ugraw n tira deg uɣmis, “nettwali deg yisekkilen ilatiniyen d imal n tmaziɣt, mačči d taɛrabt i nekreh, neɣ d tifinaɣ ɣef i nwexer”.

 

Adabu yeččur d tuccar, anwa adabu ? Agdal n uɣmis, yewweḍ-d maca, ur d-yewwiḍ ara anwa i t-igedlen ! Ur d-yewwiḍ ara kra n umagrad unṣib seg uwanek n Lezzayer i d-yuran i uɣmis tiɣremt akken ad ḥṣun yakan ansa i d-tekka, anwa i d-yefkan anaḍ akken ad yeḥbes uɣmis, maca anaḍ yewweḍ-d ɣer tezrigin akken ur d-ssizrigent ara aɣmis ma yella yettwaru kan s tlatinit. Deg temlilit i gan yiɛeggalen n uɣmis tiɣrem, Yacine Zidane, yessegza-d, yerra-d lwelha ɣer kra n tezmilin, imi ɣef wakken i d-yenna, adabu, yessebyen-d i uɣmis Tiɣremt d akken limer ad qqeblen ad t-id-ssizergen s yisekkilen n taɛrabt, awanek yewjed ad d-yeff-k tallelt, s ulday n yisebtar n udellel, d yisenfaren-nniḍen. Ma negza kra ɣef tamawt-a ; adabu yessawem-d iɛeggalen n uɣmis akken ad bedlen abrid !

 

 

 

Am yall tikkelt, tamaziɣt d arraw-is i tt-irefden ; ineɣmasen imeɣnasen ur ruǧan ara deg tedrimt n udabu, ɣas ulama adabu yegdel assizreg n uɣmis, maca ineɣmasen mazal ttarun-d i uɣmis, iɛeggalen n tedbelt n Tiɣremt kkemlen leqdic, rrefden acqqirew akken ad d-sbeyynen tamaziɣt tezmer, tla ittewlen d tulmisin, d yifedisen akk lant tutlayin-nniḍen akken ad teṭṭef abrid deg taɣult n tɣamsa. Aɣmis, tiɣremt i ruǧǧan yimaziɣen yallas, yettaweḍ-iten yallas s wallal n internet. Ineɣmasen, d yiɛeggalen n tedbelt n Tiɣremt kkemlen leqdic baṭel war tadrimt, yettaweḍ ɣer yimeɣriyen baṭel war tadrimt, ɣas ulama, imeɣriyen qqublen tufɣa n uɣmis s tumert, ttaɣent-id ula s tedrimt asmi yella, yettwasizreg. Iqeddacen n uɣmis d imeɣnasen send ad ttuneḥsaben d ineɣmasen, tuget deg-sen d imaruten, neɣ d inelmaden n tmaziɣt, ilan tayri ɣef tutlayt-nsen. Tamsalt n tira n tmaziɣt d tamsalt n tilin ; afelsafi René Descartes yennan “ttxemmimeɣ ihi lliɣ”, imeɣnasen n tmaziɣt, gren deg tidmi-nsen : “ayen i ttxemmimeɣ ad t-aruɣ akken ad iliɣ”, tira d ticreṭ, tira d azamul, tira d lsas, tira d limara, tira d tilin, d tumast, tira d imal n ugdud amaziɣ.  

 

 

 

 

 

Isekkilen s ara yettwaru uɣmis Tiɣremt !

 

 Deg yiwen n uḍris i yura Mass Said Chemakh ɣef temsalt n yisekkilen s wacu ara tettwaru tmaziɣt, yenna : « Ayen bɣan ad d-ḥetmen isekkilen n taɛrabt i tutlayin-nniḍen, imi tella yakan tutlayt taɛrabt ; amalti (tutlayt n Malta), i yettwarun n yisekkilen ilatiniyen ?

 

Seg tikti n Said Chemakh, ad d-nefk asuter-nniḍen, ayen i d-iḥetem udabu tira n uɣmis Tiɣremt s yisekkilen n taɛrabt imi, llan yakan yeɣmisen n taɛrabt ; tutlayt tamaziɣt d arawis kan i ilan azref ad xtiren s wacu ara arun tutlayt-nsen ?

 

 Deg tidet, imaziɣen kkaten akken ad d-smenɛen tutlayt-nsen seg tmettan i tt-yeggunin ɣef dra n tesnakta i iga uwanek d udabu akken ad tt-yerr d takna n tutlayt taɛrabt, ma yerna tettwaru s yisekkilen-is, ad d-yass wass ad tekcem ad tuɣal d tigẓelt, neɣ ad tettwaḥsab am akken d tantala deg tutlayt taɛrabt ! Ayen ara nḥetem ɣef ugdud ad yextir isekkilen s ara yaru tutlayt-is, am win ara iḥetmen ɣef umdan d akken d netta ara as-yextir isem i mmi-s ? Tamaziɣt mačči d adabu i tt-id-yefkan akken ass-a ad yextir isekkilen neɣ kra ma yellan, tamaziɣt d tutlayt i yiman-is, d ayla n yimaziɣen, d imaziɣen i yextaren yakan akken ad utlayen yes-s, akken ad tt-id-ferḍen, ad tt-id-seḥyun gar yifassen n udabu i as-yerran taxennaq, i as-yeqqnen takmamt n taɛrabt ɣef yimi-s akken ad yenneqḍaɛ deg-s nnefs. Amek ass-a, d adabu ara d-yextiren amek ara temmag tmaziɣt ?

 

Akken i d-teffeɣ tmaziɣt seg ttalast s umennuɣ n warraw-is, s wallaɣen, s yiɣallen, s yidammen, ara tkemmel amennuɣ ɣer sdat akken ad xtiren wid irefden taftilt-is anda ara tt-sersen s wacu rqem ara tt-sebɣen.

 

 Ɣer Said Chemakh yettwalin deg temsalt n yisekkilen s wacu d-yewwi ad tettwaru tmaziɣt, « Ɣer wid yemmalen ɣer tira umi semman « latins », askasi yeddez yebrez, yettbin-d, llan yegrawen mmugen ɣer tama n tdukliwin pro-islamistes neɣ « timseɛrabin » i yetteɛraḍen ad glunt s temɣiwent n imaruten, inelmaden, iselmaden… i iqedcen seg zik s yisekkilen ilatiniyen akken ad allsen ameslay ɣef lwaǧeb n useqdec n yisekkilen n taɛrabt neɣ ayɣer ala tifinaɣ »

 

 

 

Nsel i usfukkel aderɣal, asbeddi n Tmaziɣt d Taɛrabt tutlayt n leqqran, tutlayt n lǧennet ! Neɣ tid yecban, s useqdec n yisekkilen n taɛrabt ad tejmel akk tantaliwin-nniḍen n tmaziɣt, amzun akken tantaliwin-nniḍen n tmaziɣt deg tadra-nent d taɛrabin ? Ifukal n wallaɣen ilmawen, i mmazal ttnekkaren-d seg tnafa, sbeḥ, ɣef waɛrur-nsen Fransa, sfukkulen ma tettwaru Tmaziɣt s latins d afud i temhersa tafransist, amzun akken mazal-aɣ deg temhersa tafransist, yerna ur ḥsan ara d akken taɛrabt yakan d tamhersa ɣef tmaziɣt seg zman aqbur, yerna ran (bɣan) ula d nutni yakan ad as-allsen s uḥettem n wamek ara d-temmag tira n tmaziɣt i yimaziɣen ? Asfukkel aneggaru akk i yernan ɣur-sent, d taqacuct n usɛuggen, ma tettwaru s yisekkilen n taɛrabt, ad tifsus i ulmad sɣur iɛerbawalen, maca ma neḍfer sswab-a, ma yella yakan sswab ɣer yemdanen-a, ihi ma yella tuɛer-asen tseddast neɣ temsislit neɣ talɣa, ad ten-nbeddel s wid n taɛrabt akken ad tifsus fell-asen, tamaziɣt ad tt-nfeṣṣel akken ad temmag d tutlayt-nniḍen awi-d kan ad temmag d taɛrabt ?   

 

 

 

 

 

 

 

X.Y

 

 

 

 

 

 

 

 

Posté par Yacine KHELIFA à 22:36 - - Commentaires [0] - Permalien [#]
Tags : , , , ,

28 juin 2020

Sonatrach d Total, asnunnet n leɛqed

Sonatrach d ugraw afransis Total, deg wass n 25 deg yunyu, deg yiwen n rrabul i d-tezzuzer Sonatrach, tessenfali-d d akken yella-d umtawi ɣef usnunnet n leɛqed n ccraka  gar d Total deg taɣult n lgaz agmawi unɣil. Mmtawan ɣef usnunnet n leɛqed azal n kraḍ (3) n yiseggasen n zzyada, d agatu n usiggez n rreḥba tafransist s lgaz agmawi unɣil. Yettwaru-d deg rrabul-a « amtawa-a yessuref asiggez n rreḥba tafransist s lgaz agmawi unɣil (GNL) n Lezzayer s wazal n 2 imenyulen n ṭṭun/useggas, asemni ad yili deg tuzwirt ɣer yicbuyla n lgaz agmawi unɣil deg  Fos Cavaou ».

I snat tamiwin, i yestenyan ɣef umtawa ɣef usnunet n leɛqed, gant-d tamawt ɣef wazal ila leɛqed-a « ara yeqqim deg umezruy ameqran n tallelt gar Sonatrach d Total » i d-yettwaru deg rrabul n Sonatrach.

 

Awennit i d-iga ɣef umtawa-a, Mass Toufik Hakkar, Aselway-Anemhal Amatu n Sonatrach, i d-yessenfalin seg tama-s « S umtawa-a twekked-d Sonatrach d akken d ucrik ɣef i yella littkal, yettqadaren agazen n umtawa d leɛqed, i ilan udem uzdiq (yezdeq) deg rreḥba tagraɣlant n tfasa ».    

Seg tama n ugraw Total, Laurent Vivier, anemhal « lgaz » deg Total, yettwali, leɛqed-a amaynut ad yesnerni deg userreḥ n tṭeẓdamt n lgaz agmawi unɣil (GNL) n Total, ad yernu ad yefk addad n ccraka, akken ad yeqqim Total d ucrik adejdan n Sonatrach.

 

Akken ad yesnerni deg wazal n umtawa-a, deg rrabul-a yakan n Sonatrach, ira ad d-yessegzi ɣef wayen i d-tettwag temlilit-a i yekkfan s ustenyi n leɛqed amaynut, ɣas ulama tagnit deg rreḥbat n tfasa i yettneqlaben s waṭas. Ladɣa deg tezɣent tadamsant i deg yezmer ad yekcem umaḍal deg yiseggasen i d-iteddun, tikebbaniyin-a timeqqranin ilan ixef deg waṭas n tmura yetekkan deg rreḥbat n tfasa, ttwalint deg snat d akken leɛqud-a i gan gar-asen d ayen ara yesnernin deg wassaɣen-nsent, deg waṭas n taɣulin, ara d-yeglun s lfayda i sinat yid-sent. Ladɣa Total i yellan d udem agejdan deg wannar n tfasa deg  umezruy n ccraka akked Lezzayer. Lezzayer teṭṭef adeg wis ukuẓ i yeznuzun Lgaz agmawi i Fransa deg 2018, s wazal 7%, deffir n Norvège, Russie d Pays-Bas.

 

Amtawa-a yella-d imi ur yessaweḍ ara ugraw Total ad yaɣ kra n tigawin deg wannar n Lpitrul, n Anadarko, ara as-yeskecmen tadrim deg Lezzayer, deg umtawa akked  américain Occidental Petroleum, akken i d-yura uɣmis Libérté.

 

 

X.Y

 

 

Posté par Yacine KHELIFA à 15:41 - Commentaires [0] - Permalien [#]
Tags :

Lezzayer, Nnig n 800 000 n tmezduɣin ara yettwiksen akken ad ttunefkent i wid ara ten-izedɣen

Aneɣlaf n tmezduɣt yekcef-d d akken 800 000 n tmezduɣin yettunefken i yiɣermanen qqiment d tilmawin, ur ttwazdaɣent ara sɣur yimawlan-nsen azal n 6 wayyuren neɣ ugar.

 

 

 

 

 

Timezduɣin i yeqqimen ugar n 6 wayyuren ur ttwazdaɣen ara, ad ttwiksent wara ma uɣalen ad as-tent-id-rren i wid umi ttwafkent. Aneɣlaf n tmezduɣt Kamel Nasri, deg wass n  lexmis iɛeddan deg APN i d-yerra s ucaɣli i tririt n usteqsi n yiwen umari ɣef taluft yerzan timezduɣin d-yettak uwanek. Imḍebber amezwaru deg wannar, yesegza-d, deg yiwet n tikti, d akken ma yella iban-d ɣef bab n tmezduɣt d akken yeǧǧa-tt d tilemt ugar n 6 wayyuren « leɛqed ad yettwafsax ».

Aneɣlaf Nasri, s teseddi,  s waya, timezduɣin ara yettwiksen, ad ttunefkent i yiɣermanen-nniḍen.  Akken daɣen i d-yesenfali ɣef tseqqamut n tsastant i yebdan yakan anadi deg unnar.

Ɣef zyada, iger-d tamawt, ɣef yiɣermanen i yewwin timezduɣin war ma zedɣen-tent, nnig n tallit-agi i d-yessumer, yewwi-d ad bedden ɣer uxxam n ccreɛ akken ad sfuklen ɣef tmentel i ten-yeǧǧan ur seqdacen ara timezduɣin-a.


Deg uḍref-nniḍen, Kamel Nasri, yemmeslay-d daɣen ɣef yiwen usenfar, d timeldiw n usmel ara yilin d allal deg ufus n wazal 40 000 n yiɣermanen yettwajerden deg usenfar lekra-tunzut AADL akken ad gen lxetyarat-nsen ɣef uswir aɣenaw, anda 20 000 deg tmanaɣt. akken ara yilin lxetyarat-nniḍen n tmezduɣin, akka dasawen, ilmend n leqwaɛi ilan i lebni.

Aṭas n yisenfaren ara yuɣalen ad bdun leqdicat n lebni, imi yettuḥettem ɣef uqader n ttawilat n lemḥadra mgal avirus Covid-19, i d-yesseɣlin leɛḍil ;  i wakken ad yizmir ad refden acqirrew n usexlef n leɛḍil ɣef dra n uḥebbus n yisenfaren-a seg waṭas n wayyuren aya.

« ad d-greɣ tiɣri i yiqeddacen deg taɣult akked ujemmal n yizzayriyen ad ḥerzen ɣef ttawilat n uɛeggen, d lemḥadra, i yuɣalen tura ttuḥetmen. Yewwi-d ad nezdi mgal anfufed n uvirus akken ad nezmer ad nuɣal ɣer yisenfaren i yettwaḥebsen, ad nebdu isenfaren imaynuten deg ara d-sfaydin yiɣermanen » i yessegra s wawal Uneɣlaf n tmezduɣt.

X.Y

 

Posté par Yacine KHELIFA à 02:14 - - Commentaires [0] - Permalien [#]
Tags :

Unicef iger-d tiɣri ɣef umihi n llaẓ i yeggunin igruden deg Lyamen (Yémen).

Yella umihi ɣef luluf n yegruden deg Lyamen ad ten-tḥaz tegnit n llaẓ qessiḥen deg wussan i d-iteddun, amḍan n yegruden ur yettafen ara talqimt ɣer tagara n useggas yezmer ad yaweḍ ɣer 2,4 n imenyulen ɣef wakken i d-iga leḥsabat UNICEF. Tasuddut n tedrim n Tuddsa n Yiɣlanen Yedduklen ONU i yigruden tessawel-d tamɣiwant tagraɣlant ad tessekbel tallelt talsant.

Tuddsa n Yiɣlanen Yedduklen (ONU), terra ṭṭrad deg tettidir tmurt n Lyamen deg 5 n yiseggasen ineggura, d tawtilt tagejdant i yessawḍen amihi n llaẓ ad yemhaz. Seg mi d-yennulfa uvirus Covid-19 yerna yesnerna deg tezɣent s unfufed deg umaḍal, ladɣa deg tmura yettidiren deg ṭṭrad, anda yella waṭas n lixsas n tallelt sɣur tsuddsin n tallelt talsant. Simal tetteɣlay-d talast ɣef tmurt n Lyamen anda tadamsa-s tessaweḍ ɣer lqaɛ n lbir.

Unicef, deg rrabul i d-yessufeɣ deg 26 yunyu, yerra-d lwelha ɣer tezɣent i d-yessexlef unfufed n Uvirus Covid-19 deg umaḍal, ladɣa, deg tmura yettidiren tignatin n ccwal akked ṭṭrad, ɣef tmurt n Lyamen, yedda-d d akken « d luluf n yigurdan i yellan ɣef yimi n llaẓ ɣef dra n lixṣas ameqqran n tallelt talsant s tedrim ».

Dima deg tmuɣli n Tuddsa n Yiɣlanen Yedduklen (ONU), deg 5 n yiseggasen-a i yezrin, ttuneḥsaben d tazɣent akk n diri deg umezruy n talsa, i d-tessexlef umennuɣ udabu n Lyamen s ufus n tallelt n Suɛudiya mgal Iḥutiyen s ufus n Iran. Afmiḍi n yigurdan ara iḥaz llaẓ deg Lyemen ad yessaweḍ ɣer wazal n 20 % ɣef wakken yella, akken daɣen i yezmer ad tenerni tmettant n yigurdan ur yewwiḍen ara 5 n yiseggasen deg leɛmer-nsen sya ɣer tagara n useggas.

Ɣef wakken yesḥassef Beysolow Nyanti, agensas deg Unicef n tmurt n Lyamen, war tagermant n lɛejlan, « tamɣiwant talsant ad twali izen i d-yessebganen d akken tudert n yigerdan deg waɣlan yehruran s tezɣent, s waṭṭanen, d usyax iḥuzan tdamsa ; amer ad tili azal ».

Taluft tamezwarut i d-yewwi ad temmag, d aseḥbes n ṭṭrad, « ugar n 5 n yiseggasen n ṭṭrad aɣarim, ssnegrent agdud ayamani, tuddsiwin ttahujrent, ama d anagraw n tdawsa, d unagraw n tdamsa » i d-yessegza Sébastien Lyon, anemhal deg Unicef n Fransa. Deg Lyamen, ass-a, 90% n wučči i yellan, yettaɣ-it-id udabu seg tmurra n lberrani, anagraw n tfellaḥt yeqqujjer. Dɣa deg yisutar imezwura n Unicef  d asewjed n tesqqaymut i umtawa ɣef useḥbes n ṭṭrad. Yerna tasuddut tga-d leḥsab n wazal n 462 imenyulen n ddular i tessuter d tallelt s ara teg tigawin talsanin deg tmurt n Lyamen, s zyada ɣef 53 imelyunen ad mmugen i umennuɣ mgal avirus Covid-19.

Ɣas ulama deg tegnit n lḥers maca ala 39 % i d-yettwajemɛen deg leḥsab amezwaru d  10 % i leḥsab wis sin, ɣer wass-a ɣef leḥsabat i d-iga Unicef.

X.Y

 

Posté par Yacine KHELIFA à 02:10 - - Commentaires [0] - Permalien [#]
Tags : , ,

26 juin 2020

Ugar n 3000 n tenbiwlin n Lqaɛa deg Islande deg kraḍ n wussan ; Araju n terkam n Grímsvötn

Imazzagen deg tɣult n znezlat, ḥesben ugar n 3000 n tenbiwlin n lqaɛa deg ugafa n Islande deg kraḍ n wussan, ɣer tagara n ddurt yezrin, ɣef wakken i d-nnan, akken daɣen i ggunin tarkamt tameqqrant n uburkan ara d-yeḍrun deg unẓul n tegzirt.

Ɣer yiḍerfan n ugafa, kraḍ n znezlat i yessawḍen ugar n 5 tseddarin ɣef teskala n Richter, yiwet deg-sen ḥulfan-as ɣer Reykjavik i ibeɛden 265 km.

 

Ɣef wayyen tenna Tsuddut n liḥala n tegnawt n Islande, tinbiwlin mazal ad kemlent deg wussan i d-iteddun, ma d ammas n znezla-a yella deg yillel, azal n 20 ikilumitren sdat n Siglufjordur, yiwet n taddart tamecṭuḥt n 1200 d aterras, akked wazal n 80 ikilumitren ɣef Akureyri, tamdint tis snat n Islande s wazal n 20 alef n yimezdaɣ.

Urɛad llan imejraḥ neɣ twuɣa timeqqranin ɣer wass-a, maca, banen-d imataren n yisuyax n leqwaɛi akked ugrireb n yiẓra sdat n wammas n wadeg n znenzla. “tamnaṭ-a tenum tettenbiwil s znezlat, ma d imezdaɣ d ciṭṭuḥ kan n uɣbel” i d-yessegza Olgeir Sigmarsson, d ajyulug i iqedcen deg Tsuddut n Liḥala n Tegnawt n Islande deg Reykjavik d CNRS-université de Clermont-Auvergne.

Tikkelt taneggarut ideg twala temnaṭ-a tawsit-a n tenbiwlin, tettwassen gar  2012 d 2013, znezla akk yeqwan tettuɣal ɣer useggas 1755, ɛlaḥsab n tezrawin yettwagen seld-is, anbiwel yessaweḍ ɣer 7 n tseddarin ɣef teskala n Richter.

 

Ayen icegglen Imazzagen, iɣef tres tiṭṭ-nsen, d abrukan Grímsvötn, s teɣzi n 1 725 n lmitrat, d win mazal deg turmudt ɣer wass-a deg tegzirt Boréale, i irekmen tikkelt taneggarut deg 2011. Walan d akken yettewjad i terkamt, anda i d-gren tiɣri i yiduba idiganen d yimezdaɣ ɣef umihi d-iteddun, seg wammas n wayur n yunyu, anda i sawḍen ad gen tizmilin ɣef zyada n ufmiḍi n dioxyde n ukebri (azufr) i izaden deg-s, akked tlalit n magma ɣas ulama ur teɛmiq ara s waṭas. 

Abeɛzeq n Grímsvötn deg 2011 yegla-d s usebṭel n wazal n 900 n tmesrifgin ilmend n lɣim i d-yesexlef deg tegnawt, anda iɣed yewweḍ almi d Tgelda Yedduklen, d yiḍerfan n Lurup.

Seg yimi n umazzag i d-nebder yakan, i yennan d akken : « ilmend, dɣen, n wallalen i yersen deg wannar, i d-yettaken isallen ɣef termudt-ines », amedya n GPS i d-yettaznen isefka ɣer Reykjavik s ugensa (usatilit), d yimaṭṭafen i d-yettaṭṭafen imataren n dioxyde n ukebri (SO2), i iselḍen s tlugent  asuddes d ufmiḍi n lgaz i d-yettak. « skud lmagma yettali-d ɣef usawen, skud afmiḍi n SO2 yettimɣur » i d-yessegza umazzag Olgeir Sigmarsson. Akken daɣen i d-yettak GPS yersen ɣef lqaɛa, ula d aḥerrek n lqaɛa seg kraḍ n tallunin, yerna ma yella tcuf-d seg talliwt n lmagma.

Yesmekta-d umazzag-agi daɣen, s yiwet n tamawt, d akken seg tasut tis 20, aburkan-a yekcem deg terkamt myal 10 n yiseggasen ; amedya  deg 1996, 1998  ɣer 2004 et 2011deg tasut tis 21. Dɣa ur yeqreb mliḥ, ma yella neḥseb s tɛecret, aqlaɣ ur nebɛid ara ɣef 2021.

Yettwasizreg-d deg uɣmis Tiɣremt

Ass n 27 Yunyu 2020

X.Y

 

Posté par Yacine KHELIFA à 13:31 - - Commentaires [0] - Permalien [#]
Tags : , , ,

25 juin 2020

Tazɣent tettzad deg Libya, timura tiberraniyin grent accaren-nsent

Seg mi yettwaseɣli Mouammar Kadhafi deg 2011, Libya teckem deg ṭṭrad d teggnatin ur yeqɛiden ara gar udabu n Fayez Al-Sarraj ibedden deg Tripoli yerna yettwasṭeɛref yes-s seg tama n Temɣiwent Tagraɣlant, mgal Marical Khalifa Haftar i yeṭṭfen tama n usamar n tmurt. Yal yiwen, seg tama, ila imḥaddiyen-ines :  Adabu n Fayez Al-Sarraj tella tmurt n  Qatar, ladɣa tamurt n Ṭurk. Ma d Hafter, L’imarat n waɛraben yedduklen, akked Suɛudiya, seg tama-nniḍen teggar-d iman-is tmurt n Maṣer.

Seld tuggza n uselway n Maṣer, Abdel Fattah al-Sissi, i d-yesbeynen d akken iɛewwel-d ad yekcem s yigen akken ad ig ṭṭrad mgal adabu n Fayez Al-Sarraj i yettqeddim ad yejmel timnaḍin-nniḍen n tmurt ɣer tama n temdint Syrte. Aṭas n tmura Taɛrabin, gar tid yettemḥaddin ɣef yigen n Haftar, terna-d ɣur-sent Lbeḥrin, fkant-as lḥeq i uselway n Maṣer, yerna sbeynent-d seg taman-sent nutenti, wejdent ad d-fkent afus n tallelt.

Abdel Fattah al-Sissi, deg 20 yunyu, « yessuter deg yigen n tmurt-is, ad yessewjed iman-is akken ad ig kra n tgermatin sdaxel, neɣ ma yella terra tmara, berra i tlisa n tmurt-is ». Tamnaṭ-a n Syrte, tamdint anda ilul Kadhafi, yellan s ddaw n trebuyaɛ n Marical Khalifa Haftar i yesduklen lexsarat smana iɛeddan, teǧǧa adabu « GNA » Adabu n Tiddukla Taɣenawt ad yaẓ ɣer sdat, ayen i yeǧǧan aselway n Maṣer ad iger iman-is, iɛeggen-d d akken tamdint n Syrte d Al-Joufra « d azagg azeggaɣ », ur d-yewwi wara ad tɛeddin. Deg yiwen n wulɣu i d-tessazreg tesnurayt taneɣmast SPA, Aneɣlaf n teɣawsiwin n berra n tmurt n Suɛudiya, yenna d akken Tagelda ad d-tefk tayet, tettemḥaddi ɣef yinaw n Abdel Fattah al-Sissi, s yisem « ila azref ad yemḥaddi ɣef tmurt-is d ugdud-ines » imi tqerreb-d ɣer tlisa n tmurt-is.

S yiwet n tiɣri, seg tama n L’Imarat  Taɛrabin Yedduklen, s ṣṣut n Uneɣlaf n Tɣawsiwin n Berra, wekkden-d tadhelt-nsen i Maṣer, « akk deg leḥsabat i ummesten n tɣellist d urkad mgal umhaz n unquqel n tegnatin timceɣbin deg Libya », yefka taɣect n usenmer, deg yiwen n wakud, « lebɣi n Lqahira i iqerɛen tazla n yidamen n warraw n Libya, s usnulfu n tewtilin n lɛejlan i useḥbes n tyita n rrṣaṣ, d ulday n ustug ɣef ukala asertan ajemmali sdaw n tamawt n Iɣerfan Yedduklen ».

Deg temlilit tuhlist n udabu n Lbeḥrin, iɣef yella d aqerruy uneɣlaf amezwaru, Ageldun KHALIFA Bin Salman Al Khalifa, ula d netta iwekked-d ibeddi-s ɣer tama n Maṣer,  iqeyyem d akken « taɣellist n Maṣer, tettekki deg ujemmal n tɣellist taɣlant taɛrabt »

Seg tama-s, Adabu n Tiddukla Taɣenawt, ur yessusem ara i tuggziwin n Uselway n Maṣer d wid i yettḥuddun fell-as, yessumel « d tuggziwin ilan amihi ameqqran ɣef tɣellist taɣlant » d « ukemmel n ṭṭrad magl agdud n Libya ». Ma d Ṭurk, tewɛed d akken ad tkemmel amḥaddi ɣef Udabu n Tiddukla Taɣenawt, ara ikemlen tikli-is ɣer Syrte d usunneḍ ɣef Marical Haftar ad yejbed iman-is seg temdin-a akken ad yettwaḥbes rrṣaṣ.

I sin yegrawen, yal yiwen yefka-d leslaḥ, i usiǧhed n  win yettḥuddu, Ṭurk tefka-d leslaḥat ineggura i d-yennulfan, yerna kra n izeggaren i Udabu n Tiddukla Taɣenawt seg 06 yunyu. Maṣer, tuzen-d timesrifgin n ṣṣyada akked yiserdasen ɣer tama n temdint Sidi Barrani, deg tlisa-s akked Libya.

Aselway n Ṭurk, Erdogan, seg tama-s yestehza s « wazagg azeggaɣ », yegguma ad yeqbel ayen i d-tefreḍ Temɣunt Taɛrabt ; ṭṭmeɛ ɣef Lpitrul d Lgaz n Libya, d win ɣef i d-yettara tamawt myal tikkelt uselway n Ṭurk.

Seg tama n tmura yefɣen i taɛrabin, Fransa ur teṭṭif ara iles-is akken ad terr sebba n usekcem n Ṭurk iman-is deg temsalt n Libya, ladɣa s leslaḥ d usekbel, s ṭṭmeɛ n lɣellat n tmurt n Libya. Aselway n Fransa ur yegzin ara aṭas deg temsalt n Libya, yefka awal i Uneɣlaf n Tɣawsiwin n Berra n tmurt-is akken ad yessefruri, yessebgen-d uneggaru-a tanmegla-s ɣef wayen tga Ṭurk deg Libya, s yisem n “umennuɣ mgal rrebrab” Fransa tbedd s tsertit mgal Ṭurk ; ayen i d-ibeynen d akken ad tefk afus i Haftar.

 

Seg 2015, Libya tuɣal d taɣtest i umgaru n tezrirt, sin n yifurkan yettemxaṣamen, yal yiwen yettwamḥaddi s trekknin yemgaraden deg umaḍal i yettnaɣen ɣef yixef n tmurt ! Seg tama Adabu n Tiddukla Taɣenawt yettwaqeblen sɣur l’ONU yerna ila tallet s yigen n Ṭurk, seg tama-nniḍen Igen Aɣenaw n Libya yettwasbedden ɣef yixef-is Marical Khalifa Hafter i yeṭṭfen tallunt tawesɛant deg tmurt, ladɣa timnaḍin anda llan yeɣbula n Lpirul iɣef tebna tdamsa n Libya. Ṭṭmeɛ n tmura tiberraniyin deg lɣellat n wakal n Libya, ad aɣ-yeǧǧ ad nwali tamsalt-nniḍen icuban tin yeḍran deg Surya ?

 

   

Yettwasizreg-d deg uɣmis Tiɣremt

Ass n 27 Yunyu 2020

X.Y

Posté par Yacine KHELIFA à 14:36 - - Commentaires [0] - Permalien [#]
Tags : , , , , , , , , ,

23 juin 2020

Ad nfek daɣen iseɣ i wid ur yeǧǧin ara taftilt ad texsi !

Tamuɣli tebda-d asmi lliɣ qqimeɣ smeḥsiseɣ i tuɣac d ccnawi d tezlatin tiqvayliyin, ttemseḍfarent, mi tekfa yiwet ad d-teḍfer tayeḍ, d tamuqint n tezlatin anda xelḍen waṭas n yicennayen, gar yeqburen d yimaynuten, gar tewsatin n uẓawan yemgaraden ; tallit kan almi d-tebda yiwen d taqbur, yewwi-yi-d lḥal amzun d ṣṣut n Lwennas deg tuɣac-is tiqburin ! Maca ḥsiɣ mačči d netta, sneɣ tuɣac-is akken ma llant, ala tid ur yessekles ara. Muqleɣ deg tilifun-iw, kkseɣ-as andal, ɣef yimeɣri n uẓawan yura : « Takfarinas », azwel « Admenten », s tucḍa deg tira i d-yewwi ad tettwaru « ɛedmen-ten » !

War leɛḍil, kecmeɣ deg yiẓeṭṭaten n internet, ttnadiɣ ɣef tesfift deg i tella taɣect-a taqburt n ucennay amekkran, yellan d tagejdid deg ccna taqvaylit. Ufiɣ-tt, ufiɣ deg-s 6 n tezlatin i d-yefɣen deg useggas 1979, « Σedmen-ten, Nefka i ucengu tilelli, Lezzayer d tamurt Umaziɣ, Yaɛya wul, Teddaḍ tilas, Tegzem-d Ccuca », tasfift icuban tagi deg tallit icuban tinna deg i d-teffeɣ, ǧǧant allaɣ ad yemmuqel ɣef unbeddel yellan deg uɣanib d waddud n ccna n unaẓur-a deg talliyin yemgaraden ! Ur nenekker ara amecwar d tzakkit ila Takfarinas ɣef umḥaddi ɣef temsalt n tumast d yedles d wayen akk yerzan tamaziɣt neɣ taqvaylit ass-a, maca iban ur yeffir, ur yelli wara deg yiwen n uswir icuban tisfifin timezwura deg yiseggasen n 80 !   Ayen almi ? Refdeɣ sserseɣ, ɛyiɣ, giɣ-d ccɣel-nniḍen i yiman-iw.

Seld kra n wussan, deg uẓeṭṭa anmetti facebook, yettwazuzer-d yiwen n usarag i iga M. Mɛemri deg wannar n ddabex uḍar, deg Bgayet, anda yella yid-s, Taher Ǧawut, d Muḥend Uharun, i iga ɣef wakken i d-yenna Mass Nadir Zeroual i TQ5, temmug seg 10 ɣef 15 n wussan kan send tamettant n Dda Lmulud, deg useggas 1989 (surfeɣ ad t-id-semmiɣ s yisem-is, imi d ababat n yimeɣnasen imaziɣen). Ayen i yeǧǧan i tikkelt-nniḍen allaɣ ad d-yefk aremmuɛ n yisteqsiyen, maca ferneɣ-d kan win i ilan assaɣ d tezwert n uḍris d usteqsi amenzu ɣef umecwar n ucennay Takfarinas. Asarag yebda s wawal n Taher Ǧawut, seg leɛḍil ad d-yaweḍ M. Mɛemri i yeṭṭef ubrid ; Ǧawut iban yewhem, yerna yenna-t-id s yimi-s, ur yumin ara ad d-yaf ayen din n yemdanen i d-yerzan seg myal amkan akken ad ḥeḍren deg usarag-a, anda yesḥassef ula ɣef wamek ara d-yili uskassi seg wakken d awezɣi ad d-iṣaḥ wawal i kra n wid iḥeḍren deg wannar ! Dɣa ferneɣ-d asteqsi, amek almi tbeddel tallit seg tin deg isaragen ttmagen deg wannar n waddal, ilmend n wayen din n yemdanen i yettgaggin ad ḥeḍren, ad ttekkin deg uskasi n tagara ?

D tidet, yella aẓayar n umdan d umusnaw, ila azal d wassaɣ, maca ma nebna kan tikti-nneɣ ɣef uẓayar n umusnaw ad d-neffeɣ ɣer ugmuḍ « ulac leqdic neɣ win ara d-yekren akka am Mɛemri », ɣef wakken iyi-d-yenna yiwen ukud skasiɣ ɣef temsalt-a « win-a d Mɛemri… ». Ur riɣ ara ad geɣ aserwes gar imusnawen, ur riɣ ara ad sneqseɣ deg ccan n Mɛemri neɣ wayeḍ, leqdic n Dda Lmulud yiwen ur yezmir ad yenkeṛ azal-is ; maca ur umineɣ ara d akken ulac imusnawen i d-yekkren seld M. Mɛemri, gan leqdicat s wazal-nsen, ama d leqdicat n uḥraz, ama n umḥaddi, ama n usnerni d usnulfu, war ma nebder-d ismawen, war ma nettu leqdicat n yesdawanen !

Assaɣ i yellan deg umecwan n ucenna Takfarinas, d ayen yellan d amedya kan, nezmer ad t-neg d amatar kan ɣef unbeddel n umeccwar n ccna amḥaddi d tezlit taqvaylit sumata. Ayen i d-ilul ara Mɛemri nniḍen, d asteqsi ara d-yefken tiririt-nniḍen i tegguma tmetti ad t-twali ass-a, ɣas ulama akken i d-nenna, leqdicat nnernan, mhazen seg Mɛemri ɣer wass-a, aṭas n yimusnawen i d-ilulen yerna s wazal-nsen, maca tidet, d aẓayar ur asen-yettunefken ara ! Lwennas yecna, deg yiwet n tezlit yenna « amedyaz yebɣa ad yaru, taluft deg usefru, tikti ulac win ara tt-iwalin » ; anda ara nennadi assaɣen gar taluft d tayeḍ ɣas ulama mačči deg yiwen n wannar, maca ticki nettmeslay ɣef umhaddi d umennuɣ d uẓayar, yal taɣult tla azal deg umecwar.

Mačči yiwet n tririt i yellan ihi, akken ad nennadi ayen ur d-ilul ara Mɛemri nniḍen, neɣ Lwennas nniḍen, neɣ, ayen wa ibeddel tikli, ibeddel amecwar ? yewwi-d ad nezzi tamuɣli ɣer yiferdisen-nniḍen, i yugaren aẓayar ; d acu i asen-yefkan aẓayer yakan !

Berra i leqdic-nsen (Mɛemri, Bulifa, Lwennas…), imi nenna-d aṭas nniḍen (imusnawen imaynuten) i igan leqdicat i yuklalen ad as-nefken ismawen, yewwi-d ad nerfed iferdisen-nniḍen, icuban, « tallit, tallunt, timetti », yerna mazal ugar n yiferdisen, maca lukan ad neg wigi kan deg yixfawen-nneɣ, ahat ad tbeddel tmuɣli.

Deg tazwara, « Tallit » ; tallit yezrin, tettwassen s temhersa d ddɣel d miḥyaf i yesɛedda udabu n Lezzayer ɣef tumast tamaziɣt, ladɣa deg tallit n uselway aqbur n Lezzayer H. Boumediene i yessawḍen  ad yegdel i yeqvayliyen ula d ameslay s tutlayt-nsen tayemmat ula deg tmurt n leqvayel ! Amezruy mazal-it d anagi, inawen i iga uneggaru-a mgal tumast taqvaylit mazal-itt ɣer wass-a deg yiẓeṭṭaten n internet. Inzi yeqqar, tayuga n yezgaren, s ccuka ma tḥerseḍ-ten, ad rẓen azaglu ; anda i d-banen, aṭas n yiqvayliyen, ladɣa, i yemhaddan ɣef tumast-nsen s tmuɣli tawesɛant akken ad siwḍen ad d-ḥyun ula d iẓuran n timmuzɣa ɣas ulama s ddaw n leqher d urkas n udabu i yessexdamen iɣil ɣef ugdud aqvayli myal tikkelt deg ara yessuter azref-is, d aɣref, d agdud, ilan amezruy d yedles d tutlayt d tɣerma, yuklal ad yili d aɣlan. Ilmend n uferdis n « tallit », daɣen, yezmer ad ner timentelt ɣer weqrab n tallit-a ɣer yiseggasen 1949 d asawen, anda i d-tlul tezɣent n tumast deg ukabar PPA-MTLD, tin yettwasnen s tezɣent n tmaziɣt, neɣ amennuɣ n yiɣelnazriyen i d-yeskeflen tumast tamaziɣt i ira uqerruy n ukabar-a, Msali Lhadj, deg tallit-nni ad yemḥu s ddaw n Taɛrabt timeslemt tafriqt ugafa, anda yerra amezruy n Lezzayer, ladɣa, yeqqen ɣer tasut tis 7, ɣer unekcum n waɛṛaben inselmen ɣer tefriqt ugafa (ɣas ulama d tiwɣi mačči d anekcum !). Asakki n yiɣelnaẓriyen i ugdud aqvayli ur iɛeṭṭel ara aṭas ad t-id-teḍfer tnekra n yiqvayliyen s tiɣri n ukabar  FFS deg yiseggasen 1963 mgal igen yellan berra i tlisa, i d-ikecmen akken ad yuɣal d amhersan ɣef tmurt n Lezzayer, seld mi teffeɣ Fransa. Sdaw n leɛnaya n Boulediene, akken i nwala, ira ad yemḥu akk isem n tnaṣlit d tumast, yerna yerkeḍ tugdut iɣef mtawan yimeɣrasen yeɣlin ɣef uslelli n tmurt. Akken ad nekfu awal ɣef uferdis-a n « tallit d umezruy », ad d-nesseggri s tamawt ɣef umgired n umecwar gar umennuɣ ɣef tilin d umennuɣ ɣef uḥraz i yedduklen akken ad imɣuren yiswan, ara yisimeɣren luɛara n teggnit mgal imusnawen d yimeɣnasen deg tallit-nni.

Wis ssin d « Tallunt », tallunt akken ur as-nettsemmi wara adeg anda yufrar umennuɣ d umḥaddi ! Deg tallit-nni anda, ur yettunefk ara s waṭas, seld tufɣa seg temhersa, i ugdud ad ili yiwen uswir usnan, anda ttawil n umennuɣ yella ugar ɣer wid yeɣran d wid ilan aswir asdawan, wid yefɣen unagen, walan anda yewweḍ umaḍal deg tiktiwin n tugdut, war ma nettu d akken deg tallit-nni tcaɛ ugar tnakta n « tumast » d « ratta » i yuɣal ahat ass-a d isental anda d lɛib ad d-tmeslayeḍ fell-asen deg kra n tmura i deg tcaɛ tugdut i yerẓan tikta n miḥyaf d tikulla, anda lan izerfan n umdan ! Deg tallit-nni amennuɣ izad ma ur d-nenni wara d akken yerza kan tamurt n Leqvayel, tin iɣef  yerra lḥers udabu seg tallit ɣer tayeḍ almi d tanekra n 2001 anda tbeddel teswaḥt s yittewlen-nniḍen ɣas ulama mazal miḥyaf d ddɣel ɣer wass-a. Deg tallunt riɣ ad d-meslayeɣ ɣef uɣerbaz, ɣef tsedawit, ɣef tejmaɛt ɣef lɛerc, ɣef uxxam, anda deg myal adeg ambeddal n tiktiwin d tmusni d usakki ɣef umihi n nnger i d-yessewjad udabu mgal ayen akk yellan d laṣel d tumast d ansay yerzan agdud amaziɣ, ladaɣa aqvayli. Ayen yemgaraden ɣef tallit tamirant, d jellu n kra n tallunin anda deg ssakkayen yemdanen zik amdan aqvayli ; deg tallit tamirant, tejla tnakta n twacult, s wallalen atraren d tusnakt i yeǧǧan iterrasen ad mbaɛaden, d yiwet n tmentel daɣen i yeǧǧan ad tenger tejmaɛt, d tjemmaɛit, tudsa tasertant taqburt i yesselḥayen timetti taqvaylit, i yessaweḍ uselway aqbur Bouteflika ad yessenger deg waṭas n temnaḍin deg tmurt n Leqvayel, send tidyanin n 2001, (seld asefsex d usnulfu n lexdeɛ deg uswir n unejmuɛ d tɣerɣert n  leɛrac 2001…asnulfu n tuddsiwin umi d-ttaken ttesriḥ deg tenmehla n Waɣir n tuddar, berra i wanecta yegdel unejmuɛ war ttesriḥ, dɣa ayen akk iḍerrun deg tuddar, yettaweḍ s rrabulat neɣ seg yimi ɣer tmeẓẓuɣt ɣer tuddsiwin n uwanek…) teqqim-d tsedawit, maca, ass-a, ibeddel deg uswir n umḥaddi, imi zik, amennuɣ yella d amḥaddi ɣef tlelli d usebgen n tilin n uɣref d ugdud d tumast, maca deg tallit tamirant anda bedelent teggnatin ; amennuɣ yuɣal d win n uḥraz, d usbeddi, d usnulfu n umaynut…

 

Wis Kraḍ, « Timetti », Timetti tbeddel s waṭas, ilmend unbeddal n tikli deg umaḍal sumata, ilmend n ttawilat atraren deg tudert n yalass, anda timacinin, tiliẓri internet, bedlent tarrayt n tudert n umdan, anda yenqes s waṭas umyagar gar yemdanen, anda timetti tefreq, tbeddel udem seg tudert n ugraw ɣer tudert n uterras. Tawacult tefreq, tajmaɛt tejla, lɛerc yeqqim-d kan d tikti neɣ d isalli ɣef umezruy aqbur ! Simal timetti tettmal ugar ɣer uteras wala ɣer ugraw, ihi tikti n tlelli tanterrast tettimɣur, ur tettak ara tagnit ugar i uẓayar n ugraw… Rnu ɣef waya, tamuɣli n uterras ɣef tesnaktiwin n tmura-nniḍen deg umaḍal, ǧǧant-tt ad ibeddel, ɣef wakken i d-nenna, yella wanda tanakta n « tumast, ratta » d awalen ur yezmir ara ad d-tmeslayeḍ fell-asen deg ugraw… Tasnakta yeqnen ɣer tumast, tettwassen ugar deg tassut tis 19 imi d-nnulfant temhersiwin, maca deg tallit icuban ta, aṭas n ubeddel i d-yellan, anda tamsertit gar leǧǧnas tettimɣur ugar…

Ayen yeǧǧan imdanen ur gen ara leqrar ugar i wayen yettwarun d yimennuɣen refden weyaḍ ass-a.

 

Ɣer tagara, aḍris-a, ur yelli wara d ajemmal ɣef tmental neɣ ɣef umezruy alqayan ilan tiseddi, ur d-ttfakkan ara yedlisen ɣef umecwar n usmeɣnes d umḥaddi ɣef tumast tamaziɣt d teqvaylit ; d awal amatu, ilmend n tikti, mačči ilmend n ujemmal.

Ma yella ur nefki wara aẓayar i leqdicat yettmagen ass-a, ur d-yettlal ara Mɛemri nniḍen, neɣ Lwennas nniḍen, neɣ Bulifa nniḍen… Tamsalt tettuɣal ɣer wayen yecna Lwennas, ɣas ulama ɣef tmedyazt, akken i d-nebder timenna-s iwsawen, yettunefk ad nefk azal akken ad tzad tebɣest i wid iqedcen, ammenuɣ i lebda ileḥu ɣer sdat, anaẓur neɣ acennay, neɣ amaru ɣef wakken i d-qqaren d lemri n tmetti, ɣas ulama yewwi-d fell-asen ad ilin d imḥaddiyen, maca aɣbalu-nsen d timetti deg ttidiren, ma ur nefki wara azal i yimusnawen-nneɣ, d asenqes i nessenqes deg wazal-nneɣ, ur yezmir ara ad yili Mɛemri war wid i as-d-yezzin d wid i yefkan afus i leqdicat-is, akken daɣen ma yella neḍmeɛ ad nli Mɛemri nniḍen, yewwi-d ad nfek tallelt, d wazal, d uẓayer i wid d-yettlalen, ma ulac « feed-back » gar umusnaw d tmetti-ines, d awezɣi ad twali tmetti-nni amusnaw ara d-yufraren, d nekkni i ilaq ad neg iseɣ, ad nessimɣer deg ccan n yimusnawen-nneɣ. Send ad d-naǧǧu tisnaktiwin tiberraniyin, ad nḍal ɣef wayla-nneɣ.

Akken ad d-ilal Mɛemri, yewwi-d ad d-ilal ugdud am win yefkan azal i Mɛemri.

 

X.Y

 

Posté par Yacine KHELIFA à 19:08 - - Commentaires [0] - Permalien [#]
Tags :