Canalblog
Editer l'article Suivre ce blog Administration + Créer mon blog
Publicité
Afrawan
Afrawan
Publicité
21 janvier 2020

Ulaḥlu d temsalt n Amir Dz send tameɣra deg Cabaret Sauvage

Deg wass n 19 yennayer 2020, acennay, anaẓur amḥaddi n yidles d tummast tamaziɣt, yettwasnen s tiktiwin-is  tinmeglanin I udabu d unagraw azzayri ; ladɣa deg tallit n tefsur taberkant 2001, anda yella deg wannar s leqseḥ, yerna yufrar-d s tektiwin-is d ccna-ines i d-yefkan afud I tmesbaniyin d umennuɣ n yimeɣnasen, ama s umḥaddi i tumast, ama s uglam i temhersa d temḥeqqranit d-yeɣlin ɣef ugdud akbayli d umaziɣ s umata. War ma nettu tijmilin yerra i yimeɣrasen n tlelli d wid yeɣlin deg tefsut taberkan

Deg 19 Yennayer 2020, ilmend n umager n useggas amaynut yennayer 2970 deg leḥsab n yimaziɣen, iga yiwet n tmeɣra deg tzeqqa “Cabaret Sauvage” deg Paris (Fransa).

Tameɣra d tin igerzen s waṭas, anda ula d Uleḥlu yenna i yimferǧǧen, “ kunwi d imferǧǧen i ifazzen deg umaḍal”. Seg wakken teḥma tmeɣra Uleḥlu ur yessaweḍ ara ula ad d-yemmeslay i wid i d-yussan ad twalin s ccuq. Ur d-yemmeslay ara am yal tikkelt s wawalen s yesseḥmay allaɣen imi wigad i d-yussan ad walin Ulaḥlu tuget deg-sen d imeɣnasen n tmaziɣt d teqbaylit, d wid ilan tayri d wul ɣef tutlayt d umḥaddi ɣef tumast-nsen.

Ɣas ulama, llant kra n lemgerdat deg yisuɣan n yimferǧǧen, send ad ibeddel taɣect ɣer tayeḍ, gar wid yettsuɣgun “imaziɣen” d wid yettsuɣun “takbaylit tilellit” ; Uleḥlu yessen amek i yesɛedda taluft war ma yerna i tmest isɣaren, war ma yessuref ad temcubbak gar yeqbayliyen.

Llan wid yessawḍen, as-d-ssawḍen annay aqbayli neɣ as-d-ḍeqren annay amaziɣ akken ad ten-yerfed, maca, Ulaḥlu, netta ur yefki wara afus akken ad texleḍ gar yeqbayliyen, Ulaḥlu yenna-asen-d “Wigi i d-yettḍeggiren les drapeaux, ur d-ussiɣ ara akken ad refdeɣ les drapeaux”.

Acennay ur yebɣi wara ad d-yesnulfu tamgerda gar yiqbayliyen yellan deg tzeqqa, dɣa yestekfa s ccna, almi tekfa tmeɣra war ma yeǧǧa nuba i yisuɣan ad bedlen abrid i tmeɣra n yennayer.

Tamsalt i d-ilullen azekka-nni n tmeɣra n yennayer ilmend n tewlaft i iga Ulaḥlu d “Amir Dz”, aneggaru-a i iqedcen deg wannar n “Lḥirak”. Aṭas n wid umi yehwi wara lḥal, imi ttwalin deg Amir Dz deg wid iqqedcen deg ubrid n yimselmen d yifassen n berra i yesselḥayen amussu n lḥirak. Llan wid yettwalin Amir Dz d anelmad n Laarbi Zitout yettwasnen s ukabar asertan ineslem “Rachad”. Ineggura-a ttwasnen ladɣa s leḥsed d cceḥna i lan mgal wid iqedcen ɣef teqbaylit. Amir dz, Zitout, akabar asertan Rachad, d wid iqedcen deg EL Mgharibia Tv, sbegnen-d aṭas n tikwal tanmegla nsen i umussu n tlelli n temnaḍt n leqbayel ladɣa. War ma nettu tazrert i llan ɣef yiqbayliyen i yumnen s lḥirak almi ttun taqbaylit-nsen. Amir dz anda yufa ad yeffareṣ tagnit akken ad d-yekseb ul n yeqbayliyen akken ad ten-yezwir ɣer yimi n yizem s yisem n tegmat tazzayrit. Amihi i d-yettheggi Amir dz d terbaɛt-is i teqbaylit, yeǧǧa imeɣnasen iqbayliyen ad ten-yečč lḥir ɣef tewlaf i yettezzin deg yiẓetwan inmettiyen anda Uleḥlu d Amir dz sewren-d lwaḥid.

Aṭas daɣen i yettḥuddun ɣef Uleḥlu, ttwalin deg-s iseɣ d ccan, ma yessuter i Amir dz ad ig tawleft akked yid-s mačči d aya ara yesseɣlin deg ccan-is, imi iga tawleft yid-s s wudem n anaẓur i igan tawleft d yiwen gar wid iḥemlen lfen-is. Neɣ Uleḥlu yessuter-as tawleft akken ur d-yessadar ara deg uswir-ines.

Maca teffeɣ-d yiwet n tniẓrit (Vidéo) anda Amir Dz yettarra-d ɣef yisteqsiyen n “Hadjira Azul”, anda mi i as-tenna : “gma Uleḥlu, d netta i k-id-iɛerḍen ɣer da.. ?”, Amir Dz yerra-as-d : “Ih, ih...” war ma ikemmel-d ameslay ɣef usteqsi n Hadjira neɣ ɣef umeɛraḍ-a !

Wid iḥemlen Ulaḥlu, yettwalin Amir dz d aɛdaw n teqbaylit, d win yesseqdacen isem n teqbaylit akken ad yesnerni deg ccan-is, yekcem-iten lɣiḍ s waṭas. Ur rin ara ad ǧǧen tamsalt ad tɛeddi war aseɣti, imi deg tzeqqa, ama d wid i d-yewḍen d imezwura ama d wid yefɣen deg yineggura, ula d yiwen ur iwala Amir dz deg tzeqqa n Cabaret Sauvage deg tallit anda icennu Uleḥlu ! Ayen i d-yessebganen war ssfa n nniya n Amir dz, imi i as-yenna i Hadjira Azul “nussa-d ad nwal atmaten-nneɣ iqbayliyen...” ! D tikertkas imi aneggaru-a iga tiniẓrit-a anda ulac ula d yiwen deg yimferǧen n Uleḥlu, yerna ur d-yessebgen ara iman-is ad t-id-wallin yeqbayliyen i d-yenna yussa-d ad ten-iẓer ! Ayen i d-yessebganen tikerkas n Amir Dz, lukan d tidet yeɛreḍ-it-id Ulaḥlu tili yefka-as-d awal ama deg tazwara n tmeɣra ama deg tagara ; imi asentel n tmeɣra-a isem-is “Uleḥlu d yemdukal-is”, ihi wid akk i –dyeɛreḍ Ulaḥlu banend deg tmeɣra-a n 19 deg yennayer ala Amir dz !

Ayen ur d-ibeggen ara udem-is i yeqbayliyen imi yeqqar “nussa-d ad nwali atmaten-nneɣ leqbayel”, ayen deg tiniẓrit mi yettmeslay ɣer lcamira, yettbin ur yerkid ara lxaṭer-is, yettmuqul ẓelmeḍ yeffu-s am win i d-izegren s tufra ?

Amir dz, yeɛreḍ ad ig iseɣ i yiman-is s yisem n Ulaḥlu, ifuṛes tagnit yemmeslay-d deg tiniẓrit ula ɣef Lḥirak, yefka udem n lḥirak i  tmeɣra i iga Ucennay amḥaddi ɣef tumast taqbaylit d tmaziɣt s umata ilmend n useggas amaynut n yimaziɣen 2970. Anecta akk yella-d s waffud d tegnit i as-tefka Hadjira Azul.

Isteqsiyen, i d-yeggran, wis ahat iqbayliyen yettfen deg teqbaylit ad gzun tamsalt d yar nniya i ila Amir dz akken ad iger iḍudan-is deg temsalt n teqbaylit ?

Wissen ahat, iqbayliyen iṭṭfen deg “Lḥirak”, ad ddun deg leɣlaḍ, ad fken ul-nsen i Amir dz ; ma yella kra i d-yeqqimen yakan ?

Ahat wessen, Uleḥlu ad d-yer ɣef temsalt-a, war ma yeǧǧa isem-is ad tamsen wiyaḍ ?   

 

 

 X.Y

 

 

 

Publicité
Publicité
Commentaires
Publicité