Gzem asḥissef

Aferdis-a yettsemmid win i t-yezwaren, win i d-yettmeslayen ɣef leqniɛa, yewwi-d lḥal ɣef umdan ad yejmel gar-asen akken ad tbeddel deg tazwara tmuɣli-s s yin akkin ad iḥulfu ibeddel waddad n wallaɣ-is akked yiman-is, ayen ara d-yeglun s ubeddel deg waddad n tfekka ; akken yella deg tmenna « allaɣ iǧehden deg tfekka iǧehden ». Ad d-nesfukkel s wayen yellan deg tusna tafelsafit akked tusna n tmejjayt yerzan aṭṭanen n tfekka s umata.

Asḥissef ma nennuda ɣef tbadut-is, neḥsa belli d ajmal n yiɣeblan i yesɛa umdan s tidet neɣ i yellan d asuggen izedɣen deg wallaɣ-is i wummi yessalay leḥsabat deg lebɣi n ubeddel n teswaḥt deg i yella, tulmist yerzan leḥsabat-a, d war aḥebbus alma iceggel wallaɣ. Neɣ ticki amdan yesḥassef ɣef tɣawsa ma truḥ-as, ma ur teffiɣ ara temsalt ɣer wayen yebɣa. Ilaq ad nessemgired gar leḥsabat akked d ttexmam, imi axemmem d ayen yellan d tigawt taḥerfit n wallaɣ, macca asḥisef s ussali n leḥsabat nezmer ad t-neḥseb d aṭṭan deg wallaɣ.

Akken tebɣu tili tbadut n usḥissef, neḥsa yella deg-s uceggel n wallaɣ, leqriḥ n wul akked lɣiḍ. ayen ur ḥsin ara aṭas n yemdanen, neɣ ɣas ma yella ḥsan-t maca ur terfiden ara stnakta-s n tidet, ur ḥsin ara s lmaḍerra i yezmer ad d-yeglu ula i tfekka n umdan wamma allaɣ war ccek.

Ad d-segziɣ s umata deg wannar n temjjayt yerzan tafekka, tusna tessaweḍ ad d-taf belliamdan ticki yesḥassef, ad d-ilal deg-s uḥulfu n tugdi, aḥulfu n ddiq, aḥulfu n utqelleq. Ɣef waya, iḥulfan-a ttaǧǧan allaɣ n umdan ad yeg tigawt akken ad yemḥaddi ɣef yiḥulfan ur yeqqbil ara, amzun akken d azmul n umihi i as-d-yettlaḥaqen, dɣa ad yendeh akken ad d-teffeɣ « ladrinalin » i yettilin sdaw n tgeẓẓal, tanga-a i d-yettakken afud iǧǧehden s wayes ara iqabel « ugur », amedya ; mekti-d kra n tikkelt deg tugadeḍ, ama yesxelɛik-id wabɛaḍ neɣ yerki-d fell-ak uqjun… ad tḥulfuḍ s lǧehd nnig n wayen i tenwiḍ tzemreḍ ad trewleḍ neɣ ad tazleḍ s-yes, dɣa imi kan ara tḥebseḍ, deffir n tegnit-a, ad tḥulfuḍ s faccal yeɣli-d fell-ak. Ihi faccal-a i d-yeɣlin fell-ak d tazrert n tanga i d-nebder yakan, deg tazwar ad ak-d-tefk lǧehd syin ad teg tfekka-k tigawt i yugaren lǧehd-is, ayen ara tt-yeǧǧen ad d-tseɣli faccal ɣer tagara.

S umata, ma teḥsiḍ belli asḥissef ula d netta yettaǧǧa allaɣ ad d-yendeh ɣef ladrinalin ad d-teffeɣ deg tfekka-k, ihi skud tesḥissifeḍ, skud ad d-teffeɣ ladrinalin ara ak-yessalin aman-inek deg tazwara, cwiṭ n tallit kan, seld ad tḥulfuḍ s faccal ara idumen. Ma izad fell-ak usḥissef d yiɣeblan, ad tettḥussuḍ i lebda teɛyiḍ, turzeḍ, ladɣa addad n wallaɣ-ik ad iṣub…

Akken ad temḥaddiḍ ɣef temsalt-a, yewwi-d fell-ak ad tgezmeḍ asḥissef, yelha ma tesɛiḍ ul, ma yerkeb-ik lḥir, macca ur yelhi wara ad tdumeḍ deg waddad-a yerzan asḥissef ɣef iɣeblan.

Llant kraḍet n wetlin akken ad tɣelbeḍ tamsalt-a :

Tamezwarut, d leqniɛa s wayen yellan deg ufus-ik ;

Tis Snat, zger ɣer tigawt AU LIEUX ad tessalayeḍ leḥsabat, ad tettɛiwideḍ i yiɣeblan deg wallaɣ-ik ɣef wayen i k-iceɣben, fekk isteqsiyen i yiman-ik :

(1)   D acu-t uɣbel-iw deg tidet ?

(2)   D acu i d-yewwi lḥal ad t-geɣ akken ad tefru ?

(3)   Ma friɣ-t d acu ara ibedlen ?

(4)   Ma ur t-friɣ ara, d acu izemren ad yili ?

(5)   Ma ǧǧiɣ ugur-a neɣ temsalt-a ar tikkelt-nniḍen ?

Ad d-segziɣ lfayda n yesteqsiyen-a akked wacu i d-yewwi lḥal ad t-tgeḍ seld tiririt-ik fell-asen.

(1)    Asteqsi-a, ad k-yeǧǧ ad tegzuḍ, ad twezneḍ aɣbel-ik akked wugur tesɛiḍ, ad t-tegzuḍ s wudem-is n tidet ; akken qqaren, ma tegziḍ asteqsi, d azgen n tririt. Qqaren daɣen ma teḥsiḍ s uɣbel n tidet, ad teḥsuḍ d acu i d tifrat-is. Axaṭer ticki yemlal umdan ugur deg tudert-is, yettmuqul kan belli yesɛa ugur, tuget deg-neɣ ur ferzen ara ugur s timmad-is, ara yeǧǧen ad ferzentifrat-is.

(2)   Asteqsi-a yesɛa assaɣ ɣer usteqsi amezwaru, nenna-t-id yakan, seld mi tegziḍ aɣbel-ik, ad testeqsiḍ srid iman-ik ɣef tifrat, ɣef tɣawsa tamezwarut izemren ad tefru ugur, ma yella ulac akk, tin ara yeǧǧen ad tessenqes deg uḥric ameqran deg wugur, taɣawsa ara d(yawin tifrat ɣas mačči d tummidt.

(3)   (4) (5) Isteqsiyen-a, ma mazal ur tefri wara deg wallaɣ-ik, ad k-ǧǧen ad thenniḍ « ul-ik » deg tallit tamirat deg temmugreḍ ugur ɣas akken deg « war iman-inek » ad yeqqim uɣbel icudden ɣer wugur. Acḥal n tikkal ad tekseḍ aɣbel deg yixef-ik deg tallit deg ur d-tenwiḍ ara ad d-teɣli tifrat-is. Aya ad t-nwali deg yiferdisen i d-yeṭṭafaren.  

 X.Y