Canalblog
Editer l'article Suivre ce blog Administration + Créer mon blog
Publicité
Afrawan
Afrawan
Publicité
28 mars 2020

Tamacahut n Meckerrek, Ixef (01)

Amacahu, ɣef temɛayt-iw ad telhu, ad teḍbeɛ am usaru, ad tiɣzif anec n ujgu ; ɣef temɛayt n Meckerrek.

 

Yella yiwen n umɣar qqaren-as Meckerrek, yettidir d tmeṭṭut-is deg talwit d lɛezza, ila lerẓaq aṭas, yettidir ass s wass.

Yiwen n wass, tesla tmeṭṭut-is uɣalen-d yimnigen, ttassen-d seg tmura ibeɛden, glan-d s myal d lxiṛ, ccac d leqmac yettirriqen ! Tameṭṭut n Meckerrek rekvent-tt tismin, ur tli wara argaz ara as-d-yawin isefken s ara tzux ula d nettat, ad terfed s yixef-is gar tullas ; tennuɣna aṭas, teqqim kan deg teɣmert iman-is, ur tneṭṭeq ur tessawal. Iwala-tt deg waddad-nni Meckerrek, yessuter deg-s :

-          D acu i kem-yuɣen a tamɣart ?

-        Tebuzzeg, tuf, tenna-as ; tullas akk lan irgazen i sent-id-yettawin lervaḥ seg yinig, ttzuxunt, s yergazen-nsen, ala nekkini, deg leɛmert tewwiḍ-iyi-d ula d adɣaq urqim !

 

Meckerrek ira ad as-yekkes kra ɣef wul i tmeṭṭut-is, yenna-as :

- Kemmi axir-nsent, muqel axxam-im yeččur delxir, ikufan ččuren d lerẓaq, rrfed ayen i triḍ, ssiǧew-it, taɣeḍ-d i lmend n wul-im.

- Tsuf leḥnak-is, terra-as ; Ala, nekk riɣ ad ak-waliɣ truḥeḍ ad tinigeḍ, ad zuxeɣ yes-k mačči d tiɣawsiwin ara d-aɣeɣ deg ufus wis sin i iyi-xussen ! 

Iwet iwet Meckerrek ad tt-id-yerr ɣer ubrid n ṣṣwab, ula amek, tenna-as, ɛlamuvya, ar ttruḥeḍ am kečč am wiyaḍ, ad tinigeḍ neɣ ad ak-ǧǧeɣ ad d-teqqimeḍ weḥdek deg uxxam-agi. Meckerrek, yerfed yessers, yegzem-itt deg tidmi-s ilaq ad iṛuḥ !

Yenna-as heggi-d aɛwin ad ɣabeɣ. Tekker tɛel-as-d aɛwin, yerfed-it ɣef waɛrur-is, yeffeɣ. Awac awac, yelḥa almi yeɛya, yeqqim ad yessertiḥ, yeldi aɛwin-nni, yufa deg-s tifrit n tazart, cwiṭ n uɣrum, d tfeqlujt n yiɣi, d tyemmust n yiɣed ; yewhem, yenɛetbar, i wacu i tlaq tyemmust n yiɣed ! Yenna-as, tixxer ad tt-awiɣ ansa i kkiɣ ad tekk yid-i

Yekker ikemmel abrid-is, yedda yedda,aṭas d netta d tikli,  ur yeẓri anda i yewweḍ, yeḥbes, yeṭṭalay mebɛid, iban-as-d yiwen n uxxam, yennecraḥ mi d-yewweḍ ɣer laɛmara, ahat ad yesteɛfu dinn-a. Yettaẓ cwiṭ cwiṭ, yelḥa almi yewweḍ ɣur-s, ibedd, yessawel :

- A yat u-xx-a-m !

Yulles asiwel, yuwen ur as-d-yerri awal. Yesṭṭebṭeb ɣef tewwurt, ulac win i d-yefɣen, Yeḍleq afus-is, idemmer tawwurt tejjerjer, yennuda akk tireknin, ulac, ur d-iban walu, ulac win yellan ! Yeqqim ɣer lkanun, yettmeyyiz d acu ara yexdem.

Meckerrek, teɣli-as-d yiwet n tikti deg yixef-is, iɣaz snig lkanun tamdunt, iger deg-s tayemmust-nni n yiɣed, yerna iɣaz tamdunt-nniḍen ɣer rrif n uɣrab, iger deg-s tafeqlijt-nni n yiɣi, iɣum-iten s wakal, yeqqim yettraǧǧu anwa ara d-ikecmen.

Yettraǧǧu, yettraǧǧu, almi yesla i lheffa, d asderdek meqqren, ur yeẓri d acu-tt, yenna-as deg wul-is ahat d azger neɣ d acu-t ? Mi d-yewweḍ, yufa-t d waɣzen !

Waɣzen-nni mi d-yekcem, iwala amɣar snig n lkanun, ymmeɣ fell-as, yenna-as d acu i k-id-yewwin ɣer dagi, ɣer uxxam n yiwaɣezniwen ? Yezher, yeldi deg yimi-s, ileddayen fɣen-d seg llaẓ, ira ad t-yečč akken d amuddur !

Meckerrek, yeṭṭef iman-is, ibedd s lqed, s tebɣest, i as-yerra i uwaɣezniw :

- Ɛni d axxam n yemma-k wagi ! Wagi d axxam n baba d jeddi.

Yerna yeqqumer awaɣezniw-nni, yuɣal yenna-as :

- Cic, ma yella wagi d axxam n baba-k, af-d lekfarat n lqaɛa, ad d-iban win ilan tidet !

Awaɣzeniw yessusem, yewhem deg wayen i d-yesla. Meckerrek, yenna-as ɣiwel d acu i tettraǧǧuḍ.

Waɣzen-nni, yebren akken s tazla, iruḥ ɣer wayetma-s, yulles asen ayen i as-d-yenna Meckerrek. Iwaɣezniwen uzlen-d d tazla, ufan-d amɣar ɣer rrif n lkanun, yenna-as Waɣzen ameqran :

- D acu i as-d-tenniḍ i gmatneɣ, axxam-a d ayla n baba-k d jeddi-k ? Ma yennulfa-d mačči d ayla-nsen ad tekfuḍ d imensi-nneɣ iḍ-agi.

Yerra-as-d Meckerrek s tebɣest, yeṭṭef deg wawal-is, ur ibeddel ara ; ma d akal n baba-twen, jebdet-iyi-d lekfarat n lqaɛa d yiɣed n baba-twen d jeddi-twen. Awaɣzen-iw amekran d sebɛa wayetma-s, refden idebzen anect n leqhar, frekten akk lqaɛa, yal tiyita s udebbuz-nsen ad tḥerrek ddunit, leɛnaṣer n waman ṭṭerḍiqen, maca lekfarat n lqaɛa, wwten wwten, ulac ! Nan-as :

- D ayen umi nezmer a yamɣar, ulac !

Meckerrek iɛeggeḍ fell-asen, yenna-asen ɛelmeɣ ur d-tettafem ara, imi mačči d axxam n baba-twen. Waɣzen ameqran, yerra-as-d, yenna-as aha tura d nuba-k, jbed-d- keččini lekfarat-agi n lqaɛa  i d-teqqareḍ akka !

Meckerrek, yenna-as tura ad twalim anwa umi semman Meckerrek, ad iyi-tissinem assa ; s tmara i yeddem adebbuz-nni imi ẓẓay fell-as, iwet tikkelt ɣef wakal-nni deg i yeffer tafeqlujt-nni, terreẓ, yeffeɣ-d yiɣi yeggerger, yenna-as :

- Ha-ten lekfarat n lqaɛa !

Iwaɣezniwen, ldin deg yiqemmac-nsen, yenna-asen :

- Tezram-tent d ayen  ?

-  Nnan-as, d ayen neẓẓra, neẓẓa.

 

Yessuter deg-sen ad d-rnun ad d-skeflen iɣed n baba-tsen d jeddi-tsen. Deg Sebɛa yid-sen, ɣazzen akk lqaɛa, nudan akk axxam, ur d-ufin ara !

Meckerrek, ibedd ɣef wakal-nni ideg yeffer tayemmust-nni n yiɣed akken ur tt-id-ttawḍen ara. Mi kfan akk anadi, Meckerrek ifures tagnit, iɛeggeḍ fell-asen, yettsuɣ s ṭṭelqa n ugerjum-is fell-asen akken ad tugaden, yettkel ur t-ttafen ara yiɣed-nni, yeqqar-asen :

- Ahaw ah, ahaw, afet-tt-id ah !

Iwaɣezniwen, fkan mayna,uẓan ɣer Meckerrek, wekden-as d akken ur zmiren ara ad nadin ugar. Yenna-asen Meckerrek :

- Ḥsiɣ ur d-tettafem ara, axaṭer wagi mačči d axxam n baba-twen d jeddi-twen !

- Aha ah, jbed-d kečči iɣed agi i d-teqqareḍ ad t-nwali ?

Meckerrek, yuẓa ɣer iwaɣezniwen, yesskerker-d adebbuz s tmara i t-yessuli ɣer yigenni, yebra-as-d srid ɣef wanda yemḍel tayemmust-nni n yiɣed. Tebeɛzeq, tebḍa, tyemmust-nni yuli-d yiɣed deg-s, yejbed-d tayemmust-nni, yessekfel-itt-id s yifassen-is, yenna-asen :

- Hat-a yiɣed n baba d jeddi !

Ameqran deg yiwaɣzeniwen, yewhem, yejɛer deg wayen umi yeḥḍer, yekkukra deg umɣar akerkac ur nesɛi lkerra amek i d-yejbed lekfarat n lqaɛa d yiɣed n baba-s d jeddi-s ! Axxam ad asen-iṛuḥ gar ifassen-nsen, axxam deg i d-lulen, d ayla n wayeḍ, amek ara xemmen ?

Tusa-as-d yiwen n tikti i waɣzen ameqran, yenna-as i Meckerrek :

- A yamɣar, d tidet axxam-a d ayla-k, maca nekkni dagi n nlul, ur nli anda ara nṛuḥ, ma tebɣiḍ, qqim ad tidireḍ yid-neɣ, akken i nella ad tiliḍ. Ma yeɛǧeb-ik lḥal ?

 

Meckerrek, yerra iman-is am akken acemma ur yeḍri, ɣas ulama yeɛǧeb-it lḥal, yeffer fell-asen akken ur as-ttfiqin ara, yesuter deg waɣzen ad as-yefk tallit ad ixemmem, ad yekk yiwen n yiḍ yid-sen akken ad iwali.

Iwaɣezniwen, swejden-d imensi, zwaren deg Meckerrek, yečča, yekker ad yeṭṭes, yeǧǧa-ten akken ḥaren.

 

 

(...Tettkemmil)

Sɣur Mass : X.C

Publicité
Publicité
Commentaires
Publicité