Akken ad d-nemmeslay acuɣer i d-yewwi lḥal neɣ amek i d-yewwi lḥal ad yili umdan d ilelli ɣef wayeḍ ; ad d-meslayeɣ qbel ɣef wassaɣen yemgaraden i ten-icerken.

Assaɣen-a mgaraden ɣef sin wudmawen igejdanen, llan wassaɣen n yiḥulfan (imawlan, tayri, tanumi…) llan wassaɣen n tdukli/tamusni (aḥbib deg lxedma, lǧar, amdakel n wemdakel).

Deg tudert, ɣas ulama amdan akken nezra, yewwi-d lḥal ad yidir deg ugraw, yewwi-d ad izeṭ assaɣen gar-as akked yimdanen-nniḍen, maca skud ttimɣuren wassaɣen n tmusni skud ttimɣuren wassaɣen n yiḥulfan gar yimdanen. Skud yettɛeddi wakud ɣef wassaɣen, timɣuren ama seg yiwet n tama ama seg tama n unterras ɣer wayeḍ. Ihi, imi dayen neẓra d acu i d assaɣen-a, ḥsiɣ teẓram d acu i d tikti tagejdant ɣef wayen i bɣiɣ ad d-meslayeɣ, ɣef wacu i d anamek n tefyirt « ili-k d ilelli ɣef medden ». Zemreɣ tura ad d-meslayeɣ s telqey.

Anta tawsit n wassaɣen i yettarzen bnadem ?

D assaɣen n yiḥulfan deg tuget. Mi d-nniɣ « yettarzen » riɣ ad d-meslayeɣ ɣef turza ɣef umhaz timanit n umdan ; aya yettuɣal ɣer waṭas n yittewlen, yettuɣal ɣer waṭas n yiferdisen. Ma nniɣ-d daɣen « yettarzen » aya mačči anamek-is d niqsan, maca ad teqqim tikti-w s tseddi deg ubrid n umhaz n timanit n umdan. Iferdisen yettarzen s waṭas i udmawen : udem agejdan d tugdi n ubeddel n teswaɛt s lexsara n yimdanen ɣur tetwarzeḍ, imi ma tebɣiḍ ad taɣeḍ abrid amaynut deg tettwaliḍ udem amaynut deg tudert-ik, ad d-tembiwel tugdi-a ara yedduklen akked ccek ; ineggura-a ara k-yarzen ur tgeḍ ara asurif amezwaru ɣer tirga-k neɣ ar usenfar neɣ ar tikta-a tamynut swayes tettwaliḍ tudert-ik. Ma tmuqleḍ s tseddi, ad teḥsuḍ belli teḥsiḍ kullec yeqqen ɣer tnumi, amdan s umata yettagad ayen ur yessin ara, yetthabi ad yenzu deg wayen ur yeḍmin ara, ama deg usnegmer, ama deg lxedma, ama deg myal taɣawsa ; ɣef waya ad d-tlal tugdi yakan seg tama-k, teḥsiḍ daɣen kečč s timad-ik assenfar-a ur k-yeḍmin acema, amɛad imdanen i k-yezzin ! ur d-qareɣ ara deg tuget n teswaɛt akka ara yili lḥal, maca, ma teḍra-d akka, yewwi-d ad teḥsuḍ d akken imdanen-nni$den ara ak-dyinin tikta-k ur tseḥa wara d nutni ur yeksiben ara tikta i tliḍ kečč deg yixef-ik. Ihi ma nejmel aya, ad d-naf sin n yiɛewwiqen deg ubridik, aɛewiq amezwaru d imdanen ara k-yerzen tikti akked tirga-k, ma terẓi assalu tḍefreḍ rray-ik, ad d-tlal tugdi-a n lexsara n yemdanen ur yuminen ara s tirga-k. Ma teǧǧiḍ tugdi n lexsara n wassaɣen-a yellan gar akk akked yemdanen s umata, ḥsu ar tagara ma tɣelb-ik tegdi, ad k-teǧǧ ad tebruḍ i tirga-k, ad teqqimeḍ kan din s wudem-nni i k-snen akken yimdanen, ihi aya yezmer ad ak-dyeglu s lexsara, imi aṭas n wayen ara k-dyeglu waya ; udem amenzu, ad tɣelqeḍ tiwwura ɣef tnefsit-ik, ayen ara k-yeǧǧen ur tufiḍ ara iman-ik, ayen ara yesxesren ṭṭbiɛa-k ; deg wudem wis ssin, ma ur tufiḍ ara iman-ik yerna texser ṭṭbiɛa-k ula d udem s-wayes tettɛamaleḍ imdanen ad tenquqel, ad tenqes deg ccan ; udem wis kraḍ, imdanen temhazen deg wakud, ttbeddilen tamuɣli akked tikli, ḥsu ma kečč tqimeḍ kan din akken tgiḍ, ḥsu ihi deg tidet d ayen ara ak-yeǧǧen ad tugareḍ ɣer deffir. Ma nemmuqel ɣer wayen i izemren ad d-yeḍru ma amdan ur yelli wara d ilelli deg uswir n wassaɣen n yiḥulfan ɣef medden, d lexsara war ccek, d lexsara s sin wudmawen, lexsara n tirga-k, akked lexsara n yemdanen-nni i tugadeɣ ad ten-txesreḍ imi tugadeɣ ad d-tawiḍ amaynut s tirga-k.

Lmed ad tɛezleḍ assaɣen n yiḥulfan gar-ak akked yemdanen akked tirga-k ; d tidet assaɣen n yiḥulfan ttaken afud ma yella ḥsan yemdanen-a yerna fkan-ak-d afus n tallelt. Fru-tt d rray-ik, ma tumneḍ s tɣawsa neɣ s tirga i d-yerzan s allaɣ-ik, enzi deg ubrid n usnegmer. Eǧǧ tugdi ɣef wassaɣen-a deg ṭṭerf, amdan i yuklalen assaɣen-a ur k-yettaǧa wara ɣas ulama tirga-k ad fɣen ɣer lexsara, ma d win ara k-yeǧǧen imi tewiḍ-d amaynut s wayes tettwaqenɛeḍ, ḥsu amdan-a ma tqimeḍ akken ad k-yeǧǧ, ma tbedleḍ ad k-yeǧǧ. Ad kfuɣ awal s tmenna n Albert Einstein ‘’ Amdan ur yezmiren ara ad yettwassenɛetbaṛ, nezmer ad d-nini yeḥbes tudert ‘’[1]

X.Y

[1] Albert Einstein : « Un homme qui n’est plus capable de s’émerveiller a pratiquement cessé de vivre. »

Ili-k d ilelli ɣef medden

Partager cet article