Ass ageraɣlan n uḥḥareb akked meḥḥu n Useṭṭwi akked Tikulla
Ass ageraɣlan n uḥḥareb akked meḥḥu n Useṭṭwi akked Tikulla
Tamsalt d tin yellan seg zman aqbur, nezmer ad d-nini seg mi i tebda ddunit ! Seg wassen deg i yebda umdan yettɛic d igrawen, seg wassen ideg yebda yettazzal ɣef lɣerḍ-is ; yessaweḍ wa yeɣleb wa, ama deg tezmert ama deg tḥerci ! Din i d-tlul i tikkelt tamezwarut tmiḍrant « Akli ».
Akli d alisem i ireffed umdan ticki yella ddaw n uḍar yesmersen fell-as leqher, neɣ d win i iqedcen ɣef wayeḍ ticki yeṭṭwa-as. Agejdan deg ittewlen akked wudmawen n tikulla, d aseṭṭwi n yiɣil, anda ara naf amdan iqeddec ɣef wayeḍ deg lecɣal-is ; Akli d aqeddac ɣer umdan-nniḍen, mačči siwa anecta, macca aneggaru-a yettayal-it, bɣiɣ ad d-iniɣ amdan-a i t-yesseqdacen yuɣal d Sidi-s ! Akken i yezmer ad yili : yettwaɣ, yettwaznaz, yettusawam am sselɛa, ayen i tent-iɣelben akk yezmer ad yili d lehdiya yettwamudden ilmend n kra n tegnit. Amek almi amdan yekseb amdan-nniḍen i t-icuban ?! Amek almi amdan yeṭṭwa ɣef wayeḍ i t-icuban ?!
Deg waṭas n tikwal neɣ deg waṭas n tegnatin tettili-d lemgarda ilmend n yiẓuran akked rrasa gar wakli akked Sidi-s, anda ara naf yiwet d tannuzt ɣef tayeḍ, tugar-it deg uẓayar. Ma nerra taluft-a n useṭṭwi neɣ n tikulla ɣer uzermezruy, nezmer ad nsenned tiwtilin akked ssebat timezwura ɣer yimennuɣen i d-yettilin gar yimdanen, swa gar ugraw d wayeḍ neɣ daxel n yiwen ugraw s timmad-is, s yin akkin, yettili-d ilmend n rrebḥ akked lexsara, tikwal yettili-d akken ad ixelles yiwen ṭlaba-s neɣ ticki iga kra n twaɣit. Asteqsi ass-a, Ayadra ma mazal ssenf-a n tikulla deg kra n imeḍqan deg umaḍal ?
Ma fkiɣ-d tikti-w, d tin ara d-senfaliɣ s yiles n ucennay, anaẓur Lunis At Mengellat, yennan : « Ayen ad d-iḍerrun, ɣas akken-nniḍen, yeḍra-d zik yakan, ur tesɛiḍ d acu i d-yennulfan !», Akken daɣen ara ad tt-naf deg taɣect-is « tafejrit tamezwarut ». Taluft-a d tin i d-mazal ar wass-a, d tin i yellan deg ubrid n unerni akked ununnet, macca tbeddel kan udem ; Seg tusridt ɣar wartusridt ! Assa tuɣal-d tikulla s wudem-nniḍen, s wudem n tatrarit, akka am Tlaba, aznaz n llufanat akked usemres-nsen i tuttra deg yiberda ; miḥyaf gar urgaz akked tmeṭṭut, atɛeddi akked useṭṭwi deg yimukan n uxeddim, miḥyaf gar ugdud akked wayeḍ…Tikulla ass-a tefka iẓuran s war leɛlem n waṭas n yimdanen i liḥala ideg llan, agdud n wass-a ur ifaq ara s wudmawen imaynuten s wayes i d-tenunnet !
Tasqamut n Iɣerfan Yedduklen textar ass n 25 deg Meɣres, d ass usmekti akked uḥareb ɣef meḥḥu n tikulla deg yal amḍiq deg umaḍal, akken daɣen teḥseb tikulla d leǧrima akked utɛeddi ɣef imenzayen n talsa. Teqqar : « Yal amdan yela izerfan-is, yal aɣref yela azref ad yextir abrid-is ».
Tukkist seg uɣmis "Tiɣremt" X.Y