26 deg furar, yemmut neɣ yettwanɣa, anwa i yeẓran !

Ass-a ɣas ulamma temmuteḍ maca seg tama-w ak-d-ssutreɣ ma d tidet tella leɛnaya sɣur wid yemmuten, ttxilek zzuzer-d aduḍu yesduqqusen seg yigenni ɣef yiqvayliyen yesmuzuɣen akken ad d-duqsen seg lḥirakuc i ten-yewwin.

Ḥsiɣ ur k- ǧǧiɣ ara ad tesgunfuḍ deg talwit, maca, tamsalt d taɣawsa ara yeglun s tnaṣlit, s yiman, s uɣref...

A dda Lmulud arraw-ik Ass-a ɛuẓgen ɣef teqvaylit, ggugmen ɣef tmeslayt-nsen...tewwi-ten tutlayt n ujenwi, ttarun s yisekkilen uzligen ula d tutlayt i d-tessekreḍ seg tmettant !

Umneɣ yes-k tzemreḍ ad d- tgeḍ taɣawsa seg wanda akka i telliḍ. Ih, acuɣer weyyaḍ ttamnen, nnan-d ɣef win i d-yesseḥyan amdan seg tmettant "d mmi-is n Ṛebbi", i kečč i d-yesseḥyan agdud s timmad-is, d acu ara ak-nsemmi ?

Oh, wiyaḍ ttamnen s nbi yettmeslayen d iɣersiwen, yiwen ur iwala aya yeffeɣ i uɣzan n umdan i yeǧǧhed wallaɣ !

Nekk d azref ad amneɣ s wayen i ttwaliɣ ila tanmeẓla, yedda d tallit deg ttidireɣ, neɣ xersum s wayen ilan assaɣ ɣer wansayen-iw d uɣref-iw yuklalen ad yili d aɣlan s timmad-is. Nekk ma umineɣ yes-k Ass-a, umneɣ s wayen i tgiḍ, d wayen i d-teǧǧiḍ… Umneɣ yal yiwen yesseḥvivir ɣef wayla-s. Tucḍa gan imaziɣen, terza aqeddes i ttqeddisen ayla n wiyaḍ maca d awezɣi gan-as azal i wayla-nsen… Tutlayt d lemri n tadra, ma tejla yejla yid-s uɣref. Wiyaḍ snen amek i gan ccan i tutlayin nsen ; gan-asen tasreṭ, rran-tent d timqedsin, tiyaḍ gan-asent igen d tedbelt fkan-asent iseɣ. Llan-t tiyaḍ gan-asent tussna d llsas yevna fell-asent umaḍal. Tagi-neɣ nekkni, akken i as-yessawal Muḥya, ma twalaḍ-t sawaḍ-as azul, tedder ilmend n taywalt kan, tedder s tsekla timawit ɣef yiri n lkanun, deg tejmaɛt, deg twizi d tfellaḥt ! Ḥsu Ass-a a dda Lmulud ur d- yeqqim lkanun, ur d-teggri tejmaɛt, yerna tejla tfellaḥt (lmaɛun yuɣal d akanadi, izgaren, yuɣ adeg-nsent itraktur).

A dda Lmulud, tesseḥaḍ-d tutlayt, tenniḍ-aɣ-d amek ara nesseḥviver fell-as, twalaḍ, ula d kečč temmeslayeḍ-d ɣef yimal, tɛegneḍ-d i tarwa-k ɣef wayen i d-iteddun akken gan nbiyat i yiɣerfan- sen, tenniḍ-d win yevɣan tamaziɣt ad yissin tira-s ! Teḥsiḍ ad d- yaweḍ wass anda timawit ur tli azal deg tmetti n yalass ! Ayen i riɣ ad ak-id-azneɣ Ass-a, tarwa i wumi d-teǧǧiḍ igmuḍen, tutlayt, iswan, imenzayen, vran i ṭṭvel deg waman, war ma messlaueɣ-ak-d ɣef tidyuluǧit tanmettit !

Surf-iyi ma sxesreɣ-ak tanafa-k, suref-iyi ma ir-d-tesliḍ ara i wayen tettraǧuḍ deg yimi-w, suref-iyi ma yella wayen ur ak-d-nniɣ ara daɣen…maca ulac Nessuter deg-k leɛnaya s wigi i d-yeqqimen.

X.Y

Izen i dda Lmulud At Mɛemmer?

Partager cet article